Rusiya dronları Ternopil vilayətində enerji obyektinə zərbə vurub

Rusiya dronları Ternopil vilayətində Stary Vışnevets kəndi yaxınlığındakı enerji obyektinə zərbə vurub. Buna görə istehlakçıların bir hissəsi işıqsız qalıb.

Məlumatı vilayət administrasiyasının rəhbəri Taras Pastux Teleqramda verib.

Vilayət rəhbəri deyib: "Ternopil vilayətinə düşmən hücumları davam edir, hədəfdə kritik infrastrukturlarımız var. Bu səhər Kremenets rayonundakı Stary Vışnevets kəndi yaxınlığında pilotsuz uçuş aparatı enerji obyektinə dəydi. Nəticədə bir qrup istehlakçının elektrik təchizatı kəsildi."

Pastuxun sözlərinə görə, hələlik xəsarət alanlarla bağlı məlumat yoxdur.

Hadisə yerində aidiyyəti xidmətlər işləyir.

Əvvəlki hadisə: 18 oktyabr səhərisi Rusiya pilotsuz aparatları Volın vilayətinin Maneviçı şəhərciyində yerləşən sənaye müəssisəsinə hücum edib. Bu zaman güclü yanğın baş verib.