İlham Əliyev və İnfantino Bakıda görüşüb

Anadolu Ajansı yazır ki, İlham Əliyev sentyabrın 29-da Bakıya gələn FIFA prezidenti Canni İnfantino ilə görüşüb.

Prezident İlham Əliyev futbolun dünya və Azərbaycan səviyyəsində inkişafına verdiyi dəstəyə görə İnfantinoya təşəkkürünü bildirib.

O, gələn ay Azərbaycanda ilk dəfə təşkil olunacaq 15 yaşadək futbolçular arasında FIFA U-15 Dünya Çempionatı və Festivalı ilə 2027-ci ildə keçiriləcək 20 yaşadək kişilərarası Dünya Kubokunun hazırlıqlarının yüksək səviyyədə davam etdiyini qeyd edib.

İlham Əliyev Azərbaycanda belə böyük idman tədbirlərinin keçirilməsinin regional futbolun inkişafına töhfə verəcəyini vurğulayıb.

İnfantino görüşə görə təşəkkür edib və U-15 Dünya Çempionatı ilə festivalın dünya idman ictimaiyyətinin diqqətini çəkəcəyini bildirib.

Görüş zamanı Azərbaycanda futbolun inkişafı üçün görülən işlər, əldə olunan nailiyyətlər və FIFA ilə AFFA arasındakı uğurlu əməkdaşlıq müzakirə olunub.