Şənbə günü Fransanın bir neçə şəhərində on minlərlə şəxs cinsi zorakılığa qarşı etiraz yürüşləri keçirib. Bu, 11 yaşlı Lihanna adlı qızın zorlanıb öldürülməsi ilə bağlı yaranan qəzəb nümayişidir.

Qızın meyiti ötən ay, 29 mayda cənub-qərbdəki Fleurans şəhərində tapılıb. Lihanna məhz orada itkin düşmüşdü.

Şübhəli şəxs qurbanın məktəb dostunun 41 yaşlı atasıdır. O, əvvəllər uşaq zorlamasında iki dəfə rəsmi ittiham olunmuşdu, amma istintaq ya dayandırılmış, ya da gecikdirilmişdi.

Lihannanın ölümü cəmiyyətdə qəzəb yaradıb. Ədalət naziri Gérald Darmanın istefası tələb edilsə də, o, istefa verməyib və hadisəni "böyük uğursuzluq" adlandıraraq üzr istəyib.

Şənbə günü insanlar Parisdə "Həqiqət uşaqların dilindən çıxır!" və "160 min uşaq, siz nə edirsiniz?" şüarları ilə yürüşdə iştirak edib.

Təşkilatçılar Paris yürüşündə 100 min nəfərin iştirak etdiyini bildirir və bu aksiyanı "cinsi zorakılığa qarşı tarixi hərəkat" adlandırırlar.

Yürüşdə iştirak edən 17 yaşlı məktəbli Eline bildirib ki, bu il zorlanma ilə bağlı şikayət verib.

O deyib: “Polis zabiti mənə dedi ki, bu zorlanma deyil, həmin şəxsin həyatını məhv edə bilər, məni günahlandırdı və şikayətimə şübhə ilə yanaşdı.”

Qadınlar Fondunun sədri Anne-Sesil Melfert yürüşdən əvvəl bildirib: "Biz qurbanların yox, hücum edənlərin qorunduğu və maliyyələşdirilməsi zəif olan məhkəmə sistemi ilə yaşaya bilmərik. Zorlanma şikayətlərinin 94 faizi əlavə tədbir görülmədən rədd olunur. Bu səbəbdən, məhkəmələrə bildirilən çox sayda cinayətkar məsuliyyətdən kənar qalır."

Fransanın təxminən 110 şəhərində, o cümlədən şərqdə Dijon və cənubda Tuluzda yürüşlər keçirilib.

Koalisiya

180 təşkilatı birləşdirən koalisiya cinsi zorakılıqla mübarizədə qabaqlayıcı tədbirlərdən başlayaraq qurbanların dəstəklənməsinə qədər bütün əraziləri əhatə edən tam qanunun qəbulunu tələb edir. Onlar "parça-parça tədbirlər və qanunlar"la kifayətlənilməsi fikrindən uzaqdırlar.

Lyhanna işi ilə bağlı koalisiya onun öldürüldüyü Güers bölgəsindəki regional məhkəmə binası qarşısında və Parisdə Ədalət Nazirliyi qarşısında həftəlik etirazlar təşkil edir.

Prezident Emmanuel Makron Lihanna işində əsas şübhəlini araşdırmaqla bağlı yaranan qüsurlar səbəbindən Fransanın institutlarına etimadın azaldığından narahat olduğunu bildirib.

2022-ci il dövlət hesabatında uşaqlara qarşı zorakılıq iddialarının düzgün araşdırılması üçün lazımi personal və vaxtın məhdud olduğu vurğulanıb. Hesabatda 70 faiz hallarda şübhəlidən sorğu-sualdan sonra telefon, kamera və ya kompüter kimi əlavə maddi sübutların axtarılmadığı göstərilir.