Şənbə günü Almaniyanın qərbindəki solçu fəallar qrupu bir dəmiryol xəttini sabotaj etmək məsuliyyətini üzərinə götürüb.

İndiyə qədər məlum olanlar

"Angry Birds Commando" qrupu Almaniyanın solçu indymedia.org saytında dərc edilən məktubda Köln ilə Düsseldorf arasındakı dəmiryol xəttinə yandırıcı cihazlar yerləşdirdiyini bildirib.

Cümə səhəri Leverkusen şəhəri ilə Langenfeld qəsəbəsi arasında iki yerdə yanğın başlayıb, nəticədə qatarlar dayandırılıb və hərəkətdə fasilələr yaranıb. Yanğınsöndürənlər alovları söndürsələr də, relslərdə ziyan dəyib.

Öz məsuliyyətini qəbul edən onlayn məktubda "Angry Birds Commando" qrupu sənaye texnologiyasını ətraf mühitin məhvində ittiham edib: "Bu hərəkət planetin parçalanmasının qarşısını alacaq."

Dəmiryol xəttində təmir işlərinin şənbə axşamadək davam etməsi gözlənilir. Sabotaj aktı səbəbindən bir çox qatarın hərəkəti təxirə salınıb və gecikmələr baş verib.

Alman xəbər agentliyi DPA təhlükəsizlik mənbələrinə istinadla məktubun həqiqi olduğunu ehtimal edir.