ABŞ Maliyyə Naziri Skott Bessent İrana qarşı misli görünməmiş maliyyə təcavüzü tətbiq edəcəyini bildirib. O, ABŞ və İsrail arasında İranla müharibənin "son mərhələsinə daxil olduğunu" iddia edib.

Bessent ABŞ-ın İranla bütün iqtisadi əlaqələri "iqtisadi D-gün" kimi kəsəcəyini və bu ölkə ilə maliyyə əlaqəsi quran dövlətlərin də təcrid olunacağını deyib.

Onun bu hədəsi, ABŞ Prezidenti Donald Tramp administrasiyasının əvvəlki hədələrdən geri çəkilməsindən və müddətlərin uzadılmasından sonra səslənib.

Reuters agentliyinin məlumatına görə, İran Bessentin açıqlamalarını rədd edib və müharibə davam edərsə, bölgədən bütün neft ixracını dayandıracağını açıqlayıb.

İran rejimi Hörmüz Boğazından icazəsiz gəmilərin keçməməsi ilə bağlı da xəbərdarlıq edib.

Dünyanın beşdə biri neft və qaz məhz İran sahillərinə yaxın Hörmüz Boğazından keçir. Fevralın sonunda başlayan konfliktdən bəri isə bu neft və qaz axını ölkə tərəfindən faktiki olaraq bloklanıb.

Bessent bu barədə fikirlərini "Financial Times" üçün yazdığı məqalədə açıqlayıb. O, iqtisadi təzyiqlərin nədən ibarət olacağını ətraflı bildirməyib, lakin bazar ertəsi ABŞ-da keçiriləcək mətbuat konfransında bunu təqdim edəcəyi gözlənilir.

O yazıb: "Dünya anlamalıdır ki, məqsədimiz Tehranın tək qalanadək zülmkar rejimi dəstəkləyən hər bir iqtisadi can damarını kəsməkdir."

ABŞ müharibə dövründə İrana qarşı bir neçə dəfə hədələr səsləndirib. Tramp aprel ayında demişdi ki, “əgər İran müharibəni başa çatdırmaq və Hörmüz Boğazını açmaq üçün razılığa gəlməsə, bütün bir sivilizasiya bu gecə məhv olacaq”.

ABŞ bu mövqedən sonra vasitəçi Pakistanın təşəbbüsü və diplomatiya çağırışı ilə geri addım atıb.

İran rejimi artıq ABŞ-ın sərt iqtisadi sanksiyaları ilə üzləşib.

Keçmiş ABŞ prezidenti Barak Obama və müttəfiqləri 2015-ci ildə İrana nüvə proqramını məhdudlaşdırmaq qarşılığında sanksiyaların bir hissəsini ləğv etmək barədə razılığa gəlmişdi.

Lakin Tramp 2018-ci ildə bu razılaşmadan çıxaraq onu “əsasən qüsurlu” adlandırıb və bütün sanksiyaları yenidən tətbiq edib.

ABŞ Prezidenti Co Bayden dövründə Obama dövrü razılaşmanın bərpası üçün müəyyən cəhdlər göstərilsə də, nəticə əldə olunmayıb.

İran nüvə razılaşmasının mənası

Trampın 'iqtisadi D-Günü' İrana nə qədər zərər verə bilər?

İran sanksiyaları

İran müharibəsi

İran-ABŞ əlaqələri