Ukrayna Prezidenti Volodimir Zelenski Rusiyanın Kiyevdə çoxmərtəbəli mənzil binasına etdiyi zərbələrdən sonra Rusiyanın neft və hərbi istehsal obyektlərinə hücumların tamamilə haqlı olduğunu bildirib.

Ukraynanın hava qüvvələri cümə günü açıqlayıb ki, bu hücum dörddən çox ildir davam edən münaqişədə Rusiyanın ən böyük hava zərbələrindən biridir. Hücumlarda 24 nəfər, o cümlədən üç uşaq həyatını itirib.

Zelenski cümə günü Kiyevdə hücumdan sonra matəm günü keçirildiyi vaxt Rusiyanın hücumlarına cavab veriləcəyini və uzunmüddətli zərbələrin planlaşdırıldığını deyib. O, bununla bağlı yüksək rütbəli hərbi, təhlükəsizlik və kəşfiyyat rəsmiləri ilə müzakirələr apardığını bildirib.

Ukrayna cümə günü Rusiyanın bir neçə bölgəsində enerji və hərbi infrastruktur obyektlərinə çoxlu dron zərbələri endirib. Ryzanda dron hücumu nəticəsində dörd nəfər, o cümlədən bir uşaq həlak olub.

Ukrayna dronları yerli neft emalı zavodunu, ölkənin ən böyük neft emalı müəssisələrindən birini vurub.

Cümə günü həmçinin Ukrayna və Rusiya arasında hər iki tərəfin iştirakı ilə 205 hərbi əsirin dəyişdirilməsi ilə bağlı görüntülər yayılıb. Bu, Donald Trampın vasitəçiliyi ilə baş tutan üç günlük atəşkəsin bir hissəsi olub, ümumilikdə 1000 əsir mübadiləsi gözlənilir.

Şəhidlərin meyitləri də dəyişdirilib. Rusiya tərəfi qarşı tərəfə 526 meyit verib, Ukrayna isə Rusiyanın 41 əsgərinin meyitini alıb.

Rusiya Prezidenti Vladimir Putin münaqişənin sona yaxın olduğunu bildirəndə, Zelenski onun fikirlərini rədd edib və Moskvanın müharibəni bitirməyi düşünmədiyini vurğulayıb.

Donald Tramp isə Kiyevdəki mənzil binasına endirilən zərbələrin sülh səylərini gecikdirə biləcəyini deyib və müharibənin sona çatmasını arzuladığını bildirib.