Türkiyədə may ayında bərpa olunan enerji mənbələri elektrik istehsalının 72,3 faizinə yüksələrək son 26 ilin rekordunu təzələyib.

Bu müddətdə kömürün elektrik istehsalındakı payı 17 faizə düşərək 22 ilin ən aşağı səviyyəsini göstərib.

Enerji Bazarı İstanbul (EPİAŞ) məlumatlarına əsasən, may ayında bərpa olunan enerji elektrik istehsalında həm aylıq, həm də saatlıq baxımdan rekordlar qeydə alınıb.

24 may saat 13:00-da Türkiyədə elektrik istehsalının 84 faizi bərpa olunan enerji mənbələri hesabına təmin olunub ki, bu da son 12 ilin ən yüksəк saatlıq göstəricisidir. Əvvəlki rekord 2024-cü ilin aprelində 83 faiz olub.

May ayında günəş və külək elektrik stansiyaları ölkənin ümumi elektrik istehsalının təxminən 23 faizini təşkil edib. Bu göstərici apreldə kömür elektrik stansiyalarının payını üstələdikdən sonra ikinci ay ardıcıl olaraq onlardan yüksəkdir.

Bərpa olunan enerji istehsalının uğurlu nəticəsində hidroelektrik stansiyaların rolu əsasdır. Mövsüm yağışlarının ortalamadan çox olması səbəbindən hidroelektrik enerji istehsalı ötən ilin eyni ayı ilə müqayisədə 58 faiz artıb.

Enerji və Təbii Sərvətlər Nazirliyinin məlumatına görə, yanvarın 1-dən mayın 31-dək hidroelektrik stansiyalar 46,4 milyard kilovat-saat, külək stansiyaları 18 milyard kilovat-saat və günəş stansiyaları 14,2 milyard kilovat-saat elektrik enerjisi istehsal edib. Bu mənbələrin hər biri ilin ilk beş ayında öz rekord səviyyəsinə çatıb.

Maydakı göstəricilər bərpa olunan enerji mənbələrinin Türkiyədə elektrik istehsalındakı payının artmaqda olduğunu göstərir.

Ember-in Türkiyə və Qafqaz regionu rəhbəri Ufuk Alparslan Anadolu Agentliyinə deyib ki, may ayındakı rekordlar bərpa olunan enerjinin Türkiyənin elektrik sistemində getdikcə daha önəmli rol oynadığını təsdiqləyir.

Alparslan elektrik istehsalında bərpa olunan enerji payının artmasını enerji keçidi üçün vacib inkişaf sayıb. O vurğulayıb ki, Türkiyənin enerji idxalının təxminən 16 faizi elektrik istehsalına bağlıdır.

Alparslan əlavə edib ki, enerji keçidi yalnız elektrik sektoru ilə məhdudlaşmamalı, digər sahələr də ölkənin enerji planlamasına daxil edilməlidir. Onun sözlərinə görə, avtomobil nəqliyyatı ölkənin enerji idxalının təxminən üçdə birini təşkil edir və buna görə də transformasiyanın əsas hissəsini təşkil edir.

O bildirib ki, daxildə istehsal olunan elektrik avtomobillər, elektrikli ictimai nəqliyyat həlləri və dəmiryolu sisteminə qoyulan investisiyalar, bərpa olunan enerji investisiyaları ilə birlikdə Türkiyənin idxal olunan enerjidən asılılığını azaltmağa və enerji müstəqilliyi hədəflərinə çatmasına yardım edəcək.