Türkiyə və Səudiyyə Ərəbistanı arasında ticarətin asanlaşdırılması üçün Birgə Fəaliyyət Planı Brüsseldə keçirilən Dünya Gömrük Təşkilatı (WCO) Şurası iclasında imzalanıb. İclasda Türkiyə Ticarət Nazirliyinin müavini Sezai Uçarmaq iştirak edib.

Nazirliyin sosial media hesabında paylaşdığı açıqlamada deyilir ki, Uçarmaq 187 üzv ölkənin gömrük idarələrinin rəhbərləri və beynəlxalq təşkilatların yüksək səviyyəli nümayəndələrinin qatıldığı WCO Şurasının 147-ci və 148-ci sessiyalarında iştirak edib.

Açıqlamada bildirilir ki, iclasda qlobal ticarətin gələcəyi, məlumat əsaslı gömrük idarəçiliyi, süni intellekt, elektron ticarət və təhlükəsiz təchizat zəncirləri kimi əsas mövzular müzakirə olunub. Həmçinin, təşkilatın davam edən işləri üzv ölkələrin diqqətinə çatdırılıb.

İclas çərçivəsində Uçarmaq Səudiyyə Ərəbistanının Zəkat, Vergi və Gömrük İdarəsinin sədri Suhail Abnamı ilə görüşüb.

Görüş zamanı Türkiyəni Körfəz regionuna birləşdirən quru tranzit koridorlarının inkişafı, TIR sisteminin effektiv tətbiqi və regional eləcə də ikitərəfli ticarətin asanlaşdırılması üzrə tədbirlər müzakirə edilib.

İclasdan sonra tərəflər Avtorizə edilmiş İqtisadi Operator proqramlarının qarşılıqlı tanınmasının sürətləndirilməsi məqsədilə Birgə Fəaliyyət Planını imzalayıblar.

WCO Şurası sessiyası zamanı Uçarmaq Azərbaycan, Bolqarıstan, Macarıstan, Özbəkistan, Qazaxıstan, Maldivlər, Suriya, Gürcüstan, Kosovo, Qırğızıstan və İran gömrük idarələrinin rəhbərləri ilə də ikitərəfli görüşlər keçirərək qarşılıqlı əlaqələri müzakirə edib.