Türkiyə və Qətər ikitərəfli ticarət həcmini 5 milyard dollara çatdırmağı planlaşdırır. Bunu Türkiyənin Ticarət naziri Ömər Bolat açıqlayıb.

Bolat avqustun 24-də Ankarada Ticarət Nazirliyində Qətərin Xarici Ticarət üzrə Dövlət Naziri Əhməd bin Məhəmməd əl-Səyyədlə görüşüb.

Türkiyə-Qətər münasibətlərinin böyük inkişaf etdiyini bildirən Bolat deyib: “Ötən 21 ildə ümumi illik xarici ticarətimiz 53 dəfə artaraq ötən il 1,3 milyard dollara çatıb”.

O əlavə edib ki, keçən il qüvvəyə minən və tətbiq olunan Türkiyə-Qətər Ticarət və İqtisadi Əməkdaşlıq Sazişi 5 milyard dollarlıq ticarət hədəfinə çatmaqda mühüm rol oynayacaq.

Türkiyəli podratçıların Qətərdə ümumi dəyəri 21 milyard dollar olan 206 layihəyə imza atdığını bildirib.

Təxminən 250 Qətər şirkəti Türkiyədə maliyyə, bankçılıq, enerji, logistika, media və kənd təsərrüfatı sahələrində 7,8 milyard dollarlıq investisiya qoyub.

Həmçinin, 1 116-dan çox Türkiyə şirkəti Qətərin tikinti, xidmət və istehsal sektorlarında fəaliyyət göstərir.

Bolat deyib ki, əl-Səyyəd Qətər İnvestisiya İdarəsinin Türkiyədə investisiyalarını artırmaq istədiyini çatdırıb və bu istiqamətdə təşəbbüslər davam edir.