Türkiyə və Polşa müdafiə sənayesi sahəsində əməkdaşlığı, o cümlədən pilotsuz sistemlər, texnologiya transferi və qarşılıqlı investisiyalar istiqamətində əlaqələri dərinləşdirmək üçün addımlar müzakirə olunub. Bu, Türkiyənin müdafiə sənayesi rəhbəri Haluk Görgünün Varşavaya səfəri zamanı baş verib.

Görgün Polşanın vitse-prezidenti və Milli Müdafiə Naziri Vladislav Kosinyak-Kamış ilə görüşüb.

Görüşdən sonra açıqlama verən Görgün bildirdi ki, iki NATO müttəfiqi arasındakı əməkdaşlıq “dərin köklü dostluq, güclü müttəfiqlik əlaqələri və təhlükəsizlik sahəsində ortaq anlayış” əsasında inkişaf edir.

Danışıqlarda mövcud müdafiə sənayesi əməkdaşlığı və yeni tərəfdaşlıq imkanları müzakirə olunub.

“NATO həmrəyliyi ruhunda və ortaq məsuliyyətlə iki ölkə arasındakı strateji tərəfdaşlığın daha da gücləndirilməsi barədə fikir mübadiləsi apardıq”, – Görgün X platformasında yazaraq Kosinyak-Kamış və nümayəndə heyətinə təşəkkürünü bildirib.

Polşa Müdafiə Nazirliyi belə açıqlama yayıb ki, görüş hərbi-texniki əlaqələr, müdafiə sənayesi əməkdaşlığı və sənaye potensialının gücləndirilməsinə həsr olunub.

Tərəflər Bayraktar pilotsuz uçuş aparatlarından istifadə ilə bağlı qabiliyyətlərin artırılması, əməliyyat təcrübəsinin bölüşdürülməsi və birgə əməkdaşlıq sahələrinin müəyyənləşdirilməsini də müzakirə ediblər.

Texnologiya transferi, müdafiə sənayesi ekosistemləri arasında əlaqələrin gücləndirilməsi və qarşılıqlı investisiyalar məsələləri də müzakirənin mövzusu olub.

Kosinyak-Kamış deyib ki, danışıq sənaye potensialına yönəlib və Bayraktar dronlarından istifadə məsələləri müzakirə olunub.

Onun sözlərinə görə, Polşa dronlardan istifadə imkanlarını artırmaq istəyir və Türkiyə ilə hərbi, siyasi və sənaye əməkdaşlığı yaxşı irəliləyir.

Həmçinin vurğulanıb ki, Türkiyənin Polşaya, Polşanın isə Türkiyəyə yatırımlarının reallaşması münasibətlərin arzu olunan səviyyəyə çatmasına imkan verəcək.