TikTok və ana şirkəti ByteDance ABŞ Ədliyyə Departamenti ilə 400 milyon dollar məbləğində razılıq əldə edib. Razılıq sosial media platformasının uşaqların onlayn məxfiliyini qoruyan federal qanunları pozması ilə bağlı iddiaları həll etmək üçün bağlanıb.

2024-cü ildə Biden administrasiyası dövründə Ədliyyə Departamenti bu məsələ ilə bağlı iddia qaldırıb. Məhkəmə TikTok-un 13 yaşdan kiçik milyonlarla uşağın platformadan istifadə etməsinə imkan verərək, onların fərdi məlumatlarını valideyn icazəsi olmadan topladığını bildirib.

Razılığa görə, TikTok 400 milyon dollar ödəyəcək və eyni zamanda gənc istifadəçilərin qorunması məqsədilə yaş məhdudiyyətlərini sərtləşdirəcək, əlavə təhlükəsizlik tədbirləri tətbiq edəcək və valideynlərə uşaqlarının fəaliyyəti üzərində daha geniş nəzarət imkanı yaradacaq. Lakin platforma və ana şirkət qəsdən səhv etməsi haqda etiraf etməyib.

İddialarda TikTok-un 2019-cu ildə uşaqların məxfiliyinə dair federal tədbirlərlə üzləşməsinə baxmayaraq, hələ də çoxsaylı azyaşlıların platformada qalmasına icazə verdiyi vurğulanıb. Şirkət o vaxt Musical.ly platformasının COPPA qaydalarını pozması ilə bağlı 5,7 milyon dollar cərimə ödəməyi qəbul etmiş və 13 yaşdan kiçiklərin hesab açmasını məhdudlaşdıracağını bildirmişdi.

Amma iddialara görə, TikTok hələ də azyaşlı istifadəçiləri müəyyən etməkdə çətinlik çəkir və onların məlumatlarını reklam məqsədilə istifadə etməyə davam edir. Hətta işçilər gənc istifadəçilərin mövcudluğundan narahat olandan sonra belə, məlumatların istifadəsi dayandırılmayıb.

Şirkətin qeydiyyat siyasətində istifadəçilərin yaşını müəyyənləşdirməyi çətinləşdirən dəyişikliklər etdiyi də bildirilib.

Bu razılıq TikTok-un istifadəçi təhlükəsizliyinə yanaşması artan tənqidlər altında olan vaxtda bağlanıb. Razılığı əvvəlki günlərdə Bloomberg xəbər yayıb. Orada deyilib ki, TikTok ABŞ-dakı istifadəçilərinin təxminən 10 faizi üçün alqoritmik qoruyucu tədbiri qəsdən deaktiv edib. Bu tədbir zərərli və təhlükəli məzmuna qarşı istifadəçiləri qorumaq məqsədi daşıyırdı.

Hesabat qanunvericilər tərəfindən sərt tənqid edilib. Tennessi ştatından Respublikaçı Senator Marşa Blakbern və Konnnektikut ştatından Demokrat Senator Rişard Blumental TikTok-un baş direktoru Şou Çu və ABŞ biznesinin rəhbəri Adam Presser-ə qərar barədə suallar göndəriblər.