Şimali Koreya iki növ strateji sualtı qanadlı raketlərin sınağını keçirdi

Məlumatı Reuters Şimali Koreyanın dövlət informasiya agentliyi ÇTAC və Cənubi Koreyanın Baş Qərargahlar Birgə Komitəsinin bəyanatına istinadla yayıb.

Pxenyanda raketlərin buraxılışının qonşu ölkələrin təhlükəsizliyinə təhdid yaratmadığı bildirilib, amma raketlərin texniki xüsusiyyətləri açıqlanmayıb.

Cənubi Koreyanın Baş Qərargahlar Birgə Komitəsi raketlərin trayektoriyasını buraxılışdan əvvəl, uçuşun əsas və son mərhələlərində izlədiyini bildirib. Bir raket növünün şaquli buraxılış qurğusundan, digərinin isə torped qutusundan buraxıldığı qiymətləndirilib.

Cənubi Koreya hərbi analitikləri ÇTAK-ın yayımladığı fotolara əsaslanaraq sınaqların taktiki nüvə silahı ilə təchiz olunmuş ilk şimali koreyalı dizel sualtı qayıq "Qəhrəman Kim Gun Ok"dan həyata keçirildiyini müəyyənləşdirib.

Koreya Müdafiə və Təhlükəsizlik Forumunun baş katibi Sin Con U manevrlərin silahların son sınaq mərhələsinə keçidin göstəricisi olduğunu açıqlayıb.

Sin Con U bildirib ki, döyüş sistemlərinin operativ yerləşdirilməsi üçün sınaqlar davam edir. Tezliklə sualtı qayıqlardan ballistik raketlərin də buraxılışı baş tutacaq.

Müdafiə ekspertləri sualtı qayıqlarda şaquli buraxılış qurğusunun torped aparatlarından daha sürətli və çox sayda raketin eyni anda buraxılışına imkan verdiyini bildirirlər. Bu, hava hücumundan müdafiə sistemlərinin zərbə reaksiyası üçün lazım olan vaxtı xeyli azaldır.

Əvvəlki hadisələr:

2024-cü ilin yanvarında Pxenyan ilk dəfə yeni strategiya sualtı qanadlı raket "Pulxvasal-3-31" (Pulhwasal-3-31) raketinin sınaq buraxılışını həyata keçirib. O zaman raketlər sualtı qayıq torped aparatlarından Kimin şəxsən iştirakı ilə buraxılıb.

2026-cı ilin oktyabrının əvvəlində Şimali Koreya quru buraxılış qurğularından ballistik raketlərin ardıcıl poliqon sınaqlarını keçirib.