Rusiyada minimum əməkhaqqının artırılmasının təsirləri izah edildi

News.ru yazır ki, Dövlət Dumasının deputatı Svetlana Bessarab minimum əməkhaqqının artmasının birbaşa olmasa da, tez-tez müəssisələrdə tarif şəbəkəsinin və Əməkhaqqı Fondu-nun yenidən nəzərdən keçirilməsinə səbəb olduğunu bildirib.

Bessarabın sözlərinə görə, bu artım yalnız əməkhaqqı sistemi deyil, həm də sosial ödənişlərə təsir edir. O xatırladıb ki, aşağı ixtisaslı işçinin yüksək və ya orta ixtisaslı işçi ilə eyni və ya daha yüksək məvacib alması mümkün deyil.

Deputat əlavə edib ki, minimum əməkhaqqının yüksəlməsi, adətən, hamiləlik və doğuş ödənişlərinin, həmçinin rəsmi gəliri olmayan və ya minimum məvacibdən aşağı gəlirli qadınlar üçün uşağa baxış aylıq ödənişlərinin artmasına gətirib çıxarır.

Bundan əlavə, bəzi hallarda minimum əməkhaqqının artımı alimentlərin məbləğinə təsir edir. Məsələn, alimentlər məhkəmə qərarı ilə təyin edilmədikdə və valideynlər arasında notarial razılaşma olmadıqda bu təsir özünü göstərir.

Əvvəlcə Rusiya Maliyyə Naziri Anton Siluanov bildirmişdi ki, 2027-ci ildə minimum əməkhaqqı 6,8 faiz artaraq 28,9 min rubla çatacaq. Prezident Vladimir Putin isə 2030-cu ilə qədər minimum əməkhaqqının 35 min rubla qaldırılmasını hədəfləyib.