Rusiya hücumu sonrası Kiyev və ətrafında elektrik sönüb, su təzyiqi azalıb

15 oktyabr axşamı Kiyev və ətraf rayonlarda Rusiya hücumundan sonra bəzi yerlərdə elektrik kəsilib.

Məlumatı Ukrayna Energetika Nazirliyi, Hava Qüvvələri və Kiyev meri Vitali Kliçko verib.

Ukrayna Energetika Nazirliyinin açıqlaması: "Kritik enerji infrastrukturu obyektinə növbəti Rusiya hücumu nəticəsində Kiyev və ətraf rayonlarda bir hissə abonentlər işıqsız qalıb.

Təhlükəsizlik şəraiti imkan verən kimi briqadalar operativ şəkildə elektrik enerjisinin bərpasına başlayacaq. Energetiklər işığın tezliklə bərpası üçün əlindən gələni edirlər."

Nazirlik yalnız etibarlı mənbələrdən istifadə etməyi və Rusiya Federasiyasına kömək ola biləcək məlumatların yayılmamasını tövsiyə edib.

Qeyd olunub ki, Kiyevdə 15 oktyabr axşamı üç saata yaxın hava həyəcanı davam edib. Hava Qüvvələri şəhər və ətrafda Rusiya pilotsuz uçan aparatlarının olduğunu bildiriblər.

Kiyev meri su təzyiqinin şəhərin sağ sahil hissəsində aşağı düşdüyünü açıqlayıb. Xüsusilə Qoloseyev, Svyatosin, Solomeya və Şevçenkovsk rayonlarında enerji qurğularının zədələnməsi səbəbindən təzyiq azalıb.