Raketa hücumu təhlükəsi ilə əlaqədar Kiyevdə hava həyəcanı elan edildi

Ukrainskaya Pravda yazır ki, sentyabrın 30-na keçən gecə Kiyevdə və bir sıra vilayətlərdə düşmənin balistik raket hücumu təhlükəsi səbəbindən hava həyəcanı elan olunub.

Saat 2:44-də Hava Qüvvələri raket təhlükəsi barədə məlumat verib.

Bir neçə dəqiqə sonra paytaxt və bölgələrdə hava həyəcanı elan edilib.

Hava Qüvvələrinin məlumatına görə, balistik raketlərin Kiyev istiqamətində hərəkətdə olduğu xəbərdarlığı verilib.

Ötən gecə, sentyabrın 29-da da eyni səbəbdən hava həyəcanı elan edilmişdi, həmin vaxt paytaxtda partlayışlar və yanğınlar baş vermişdi.