OpenAI Microsoft-un ofis proqramlarına rəqib oldu

TechCrunch yazır ki, OpenAI Microsoft-la yaxın əməkdaşlıq etsə də, iş proqramları bazarında iddialı şəkildə fəaliyyətə başlayır.

OpenAI "Space" adlı yeni funksiyanı təqdim edib. Bu, ChatGPT daxilində əməkdaşların chatbot və "Dots" adlı süni intellekt agentləri ilə birlikdə işlərini təşkil edə biləcəkləri paylaşılmış iş mühitidir.

CEO Sem Altman bildirib ki, "Space"də istifadəçilər fayl və səhifələri bir yerdə saxlayaraq onlara konkret tapşırıqlar verə bilərlər, məsələn, komanda kanalını yoxlamaq və uyğun yeniliklər etmək.

Eyni zamanda OpenAI "Pages" adlı yeni söz emal proqramını istifadəyə verib. Bu proqram Google Docs və Microsoft Word-a alternativ kimi sənədlər daxilində yazı yazmaq, araşdırma aparmaq, cədvəllər yaratmaq və şəkillər əlavə etmək imkanı verir.

OpenAI əməkdaşlıq üçün nəzərdə tutulmuş "collaborative slides" funksiyasını da təqdim edib. Burada istifadəçilər və agentlər səsli şəkildə təqdimatlar yarada, birgə redaktə edə və şərhlər əlavə edə bilərlər.

Microsoft və Salesforce kimi digər proqram təminatı şirkətləri isə süni intellekt sahəsində OpenAI ilə rəqabət aparmaq üçün yeni məhsullar inkişaf etdirirlər.