NASA yaşlanan Swift teleskopunun atmosferdə yanıb məhv olmasının qarşısını almaq üçün aylar davam edəcəyi gözlənilən mürəkkəb robot missiyasını işə salıb.

Missiyanı ABŞ-ın Katalyst Space Technologies şirkəti tərəfindən hazırlanan Link kosmik aparatı ilə Northrop Grumman cümə günü Sakit Okeandakı Marshal Adalarından başladı.

Modifikasiya olunmuş təyyarənin göbəyindən Pegasus raketi havaya qalxdı və Link aparatını təxminən bir ay ərzində NASA-nın Swift müşahidə stansiyasına çatdırmaq üçün trayektoriyaya yerləşdirdi.

Robot missiyanın ilk uçuşu çərşənbə axşamı üçün planlaşdırılsa da, hava şəraiti və texniki problemlər səbəbindən təxirə düşdü. İkinci cəhd cümə günü saat 08:36 GMT-də Sakit Okeandakı bir atolldan həyata keçirildi.

30 milyon dollar dəyərində olan bu səylə yerə doğru enməkdə olan Swift teleskopunu xilas etmək məqsədilə robot orbitə göndərilir. Əgər missiya uğurlu olarsa, peyklərə ikinci ömür vermək üçün yeni imkanlar yaranacaq.

2004-cü ildə işə düşən Swift, son dövrlər günəş tufanları səbəbi ilə əvvəlkindən daha sürətlə orbitdən enir. 250 milyon dollar qiyməti olan teleskop kainatdakı ən güclü partlayışlar hesab olunan qamma şüa partlayışlarını araşdırır.

Robot Swift teleskopuna yaxın orbitə çatdıqda günəş panellərini açacaq və bir sıra yoxlamalar aparacaq.

Daha sonra o, geniş kosmosda teleskopu tapmalı, ətrafında dönməli və üç robot qolundan istifadə edərək qoşulmalıdır. Bu manevrlərin bir neçə həftə çəkəcəyi gözlənilir.

Nəhayət missiya Swift-in orbitini təxminən 300 km yüksəltməyə çalışacaq ki, bu da onun ilkin orbit mövqeyinə yaxın olacaq. Əməliyyat ən azı bir ay davam edəcək.

NASA-nın astrofizika bölməsinin rəhbəri Şon Domqal-Qoldman çərşənbə axşamı jurnalistlərə bildirib: “Bu, bir-birinin üstünə yığılmış çoxsaylı ilk təcrübələrdir. Sadəcə bu cəhdə etdiyimiz üçün çox minnətdaram.”