Çinin ən tanınmış yeraltı kilsələrindən birinin qurucusu həbsdən azad edilərək ABŞ-da ailəsi ilə görüşüb.

Zion Kilsəsinin qurucusu Ezra Jin cümə axşamı ABŞ-a gəlib. O, oktyabrda xristianlara qarşı geniş həbs əməliyyatı çərçivəsində saxlanılan kilsə üzvlərindən biri idi.

Jin ailəsi açıqlamasında "Biz həqiqətən möcüzəyə şahid olduq və sevincimiz çox böyükdür. Bu böyük möcüzə üçün Allaha minnətdarıq. Prezident Tramp və administrasiyasına da təşəkkürümüzü bildiririk".

Çinin Xarici İşlər Nazirliyi dərhal şərh verməyib.

Jinin azad olunması Çinin vətəndaşını buraxması baxımından nadir haldır və görünür, bu, ABŞ-ın lobbi fəaliyyəti nəticəsidir. 2024-cü ildə çin mənşəli amerikalı pastor David Lin də Dövlət Departamentinin lobbiçiliyi sayəsində 20 illik həbsdən sonra azad edilib.

Jinin işi may ayında Donald Trampın Pekinə səfəri zamanı müzakirə olunub. ABŞ prezidenti bildirib ki, Çin prezidenti Si Cinpin Çində həbsdə olan pastorların azad olunmasını ciddi düşünsə də, Böyük Britaniya vətəndaşı Cimmi Lay kimi digər həbsdə olan şəxslərlə bağlı irəliləyiş daha çətindir.

Jinin həyat yoldaşı və uşaqları ABŞ-da yaşayır. Onlar bir neçə dəfə ABŞ hakimiyyətinə və birbaşa Trampa müraciət edərək onun azad olunmasını tələb ediblər. Jinin qızı Grace Jin Drexel isə noyabrda konqres qarşısında ifadə verib. Tramp daha sonra onu “gözəl qız” adlandıraraq və Jinin işini Si Cinpinlə müzakirə edəcəyinə söz verib.

Jin Çinin yeraltı kilsə hərəkatının ən tanınmış simalarındandır. O, Zion Kilsəsini 2007-ci ildə yaradıb. 2018-ci ildə Pekindəki kilsənin fiziki məkanı bağlanıb, lakin qrup onlayn mühazirələr vasitəsilə minlərlə insana çatmağa davam edib.

Çində xristianlıq qanunidir, amma yalnız dövlət nəzarətində olan kilsələrdə ibadət icazəlidir. Hökumət 2018-ci ildə Çində 44 milyon xristian olduğunu qeyd edib, amma qeyri-qeydiyyatlı inanclılarla birlikdə bu rəqəmin 130 milyon olduğu təxmin edilir.

Bir çox xristian dövlət nəzarətində olan kilsələrdən uzaq durur və "ev kilsələri" olaraq bilinən yeraltı qruplarda, o cümlədən Zion-da ibadəti üstün tutur.

Ötən il boyunca Çin ev kilsələrinə qarşı geniş repressiya aparıb. Yanvarda digər tanınmış qrup Early Rain kilsəsinin üzvləri həbs olunub. İyunda Cənub-qərbi Çində, Sichuan əyalətində Early Rain kilsəsinin toplantısına polis müdaxilə edib və 30-dan çox adam sorğu üçün aparılıb.

Zion Kilsəsinin bir neçə üzvü hələ də həbsdədir. Ötən ay Jini də daxil olmaqla doqquz üzv qanunsuz biznes fəaliyyəti və fırıldaqçılıq ittihamları ilə prokurorluğa verilib. Digər doqquz nəfər məhkəməyə qədər girovla azad edilib.