Myanmanın mərkəzində yerləşən buddist monastrına hərbi aviazərbə nəticəsində 14 nəfərin həyatını itirdiyi bildirilib. Bu barədə müxalifət qrupu və yerli sakin məlumat verib.

Hücum Myaung rayonunun Swel Le Oh kəndində baş verib. Bu kənd ölkənin ikinci ən böyük şəhəri Mandalaydan təxminən 75 kilometr qərbdədir. Myaung Rayonunun Vətəndaş Müdafiəsi və Təhlükəsizlik Təşkilatının (CDSOM) sözçüsü Nway Oo cümə günü bildirib ki, döyüş təyyarəsi kənddəki monastrın həyətini bombalayıb, nəticədə 14 nəfər, o cümlədən üç qadın ölüb, 20 nəfər yaralanıb.

Bir yerli sakin The Associated Press-ə anonim açıqlamasında deyib ki, monastr və ətrafında buddist orucu üçün bir həftəlik tətil zamanı 100-dən çox adam olub. Təyyarə kənd üzərinə 15 dəqiqə fərqlə iki bomba atıb.

Həmin sakin CDSOM-un açıqladığı 14 nəfərin ölüm sayını təsdiqləyib və bildirib ki, onun qayınanası hücumda həlak olub.

BBC-nin Burmalı xidməti və yerli media kanalları ölənlərin sayını 10 ilə 14 aralığında göstərib.

Hərbi qurum hücumla bağlı dərhal şərh verməyib. Lakin əvvəllər yalnız qanuni hədəfləri vurduğunu açıqlayıb.

Myanmarda 2021-ci ilin fevralında ordu seçilmiş hökumətin səlahiyyətini ələ keçirəndən sonra ölkə əhatəli vətəndaş müharibəsinə sürüklənib. Hərbi idarəçilər sülh nümayişlərini zor tətbiq edərək yatırdıqdan sonra onların əleyhdarları silahlanıb.

Hökumətə qarşı döyüşən qüvvələr müxtəlif etnik və siyasi qruplardan ibarətdir. Bu qrupların bəziləri onilliklərdir mövcuddur.

81 yaşlı Nobel Sülh Mükafatı laureatı və demokratiya fəalı Aung San Suu Kyi 2021-ci ildən etibarən həbsdədir. O, Myanmarda dövlət müşaviri vəzifəsində çalışıb, apreldə ev həbsinə keçirilib.

Vaşinqtonda yerləşən Xarici Münasibətlər Şurası bildirir ki, müharibə 100 mindən çox insanın ölümünə, 5,2 milyon nəfərin isə doğma yurdlarını tərk etməsinə səbəb olub.

Dirəniş qüvvələri və etnik ordular ölkənin təxminən 42 faizinə nəzarət edir, hərbi hökumət isə 21 faizini idarə edir.

Myaung rayonu hərbi hökumətə qarşı müqavimətin güclü olduğu Sagaing bölgəsində yerləşir.

BMT tərəfindən yaradılmış Myanmara Müstəqil Araşdırma Mexanizmi (IIMM) avqust ayında bildirib ki, dekabr-yanvar seçkilərinə hazırlıq dövründə hava hücumları artıb və sonradan da davam edib.

Myanmanın Xarici İşlər Nazirliyi IIMM-in hesabatını rədd edərək yalnız “terrorçuları” hədəf aldıqlarını və təhlükəsizlik qüvvələrinin mülki şəxslərə zərər verməmək üçün məsuliyyətlə davrandığını vurğulayıb.