Panama çərşənbə axşamı Honduras və El Salvordan sonra El Nino səbəbindən fövqəladə vəziyyət elan edən son Mərkəzi Amerika ölkəsi oldu. Bu quraqlıq artıq Panama Kanalında gəmilərin hərəkətinin azalmasına gətirib çıxarıb.

Panamanın daxili işlər naziri Dinoska Montalvo bildirib ki, bu qərar hakimiyyətə El Ninonun yaratdığı vəziyyətə hazırlaşmağa imkan verəcək. Quraqlıq məhsul itkilərinə yol açmaqla aclıq təhlükəsi yaradıb.

El Salvador isə eyni gün təsirlənmiş ərazilərdə nəzarət, monitorinq və yardım işlərini sürətləndirmək üçün maksimum həyəcan vəziyyəti elan edib.

Vətəndaş müdafiəsi şöbəsi sosial şəbəkədə yazıb: “Biz ölkə üzrə meteoroloji və kənd təsərrüfatı quraqlığına görə qırmızı xəbərdarlıq veririk.”

El Nino Sakit Okeanın mərkəzi və şərqi ekvatorial bölgələrində səth temperaturunun yüksəlməsi ilə müşayiət olunan hava hadisəsidir. O, külək, yağış və hava şəraitində qlobal dəyişikliklərə səbəb olur.

Bu ilki El Nino hadisəsi son illərin ən güclüsü sayılır və qlobal temperaturun rekord səviyyələrə çatmasına təsir edir.

Mərkəzi Amerika artıq ciddi quraqlıqla üzləşib. Bu səbəbdən Honduras ərazisinin 80 faizinə həyəcan vəziyyəti tətbiq olunub, Panama Kanalında isə aşağı düşən su səviyyəsi gəmilərin keçidini məhdudlaşdırıb.

El Salvorda isə adətən çox yağan yağışların olmaması məhsulların məhv olmasına səbəb olub. Kənd təsərrüfatı nazirliyi suvarma sistemi olmayan kənd ailələri üçün ərzaq yardımı elan edib.

El Salvadorun bir neçə bələdiyyəsi Mərkəzi Amerikanın Quru Kəmərində yerləşir. Həmin zonada həmçinin Honduras və Nikaraqua hissələri də var və burada ekstremal hava hadisələri daha çox baş verir.

İyunda və iyulda hər üç ölkə aylıq temperatur rekordu qırıb ki, bu da aclıq riskini artırıb. Bu ayın əvvəlinə kimi El Salvorda 14 yeni temperatur rekord qeydə alınıb.

Daha cənubda Peru keçən həftə El Nino səbəbindən şəhərlərinin üçdə birində fövqəladə vəziyyət elan edib. İsti və yağışların ərzaq istehsalına ciddi ziyan vura biləcəyi vurğulanıb.