Kanada ukraynalılara dəstək üçün əlavə vəsait ayırdı

Ukrainskaya Pravda yazır ki, Kanada rus əsarəti və işğalı zamanı əziyyət çəkən ukraynalılara dəstək məqsədilə 863 min Kanada dolları (təxminən 640 min ABŞ dolları) əlavə ayırıb.

Kanadanın Xarici İşlər naziri Anita Anand bildirib ki, bu vəsait əsasən münaqişə ilə bağlı seksual zorakılıq qurbanlarına, eləcə də vətəndaşlara, hərbi əsirlərə, uşaqlara və onların ailələrinə dəstək verən ukraynalı qeyri-hökumət təşkilatlarına çatacaq.

Anita Anand həmçinin xatırladıb ki, ayın əvvəlində Kanada Rusiyaya qanunsuz aparılan ukraynalı uşaqların geri qaytarılması üçün təxminən 6 milyon Kanada dolları ayırmışdı.

Bu maliyyə yardımı uşaqların reinteqrasiyası, axtarışı və geri gətirilməsi işlərini, həmçinin onların təlim və hərbi səfərbərliyə cəlb olunmasının qarşısının alınmasını dəstəkləyir.

Ümumilikdə, bu iki yardım paketi Kanadanın ukraynalı uşaqların evə qaytarılmasına dəstəyini təxminən 7 milyon Kanada dollarına çatdırır.

Bundan başqa, bu ay ölkənin baş naziri Mark Karni bildirib ki, Kanada Ukraynanın hava hücumundan müdafiəsi üçün raket-interseptorların alınmasına 350 milyon Kanada dolları (253 milyon ABŞ dolları) ayıracaq.