İspaniyada güclü yağışlar səbəbindən ölənlər oldu

Anadolu Ajansı yazır ki, Kataloniya muxtar regionunda axşam saatlarından başlayaraq davam edən güclü yağışlar səbəbindən "qırmızı" xəbərdarlıq elan edilib və yerli sakinlərə ehtiyatlı olmaları barədə məlumatlar göndərilib.

Barselonanın Tordera rayonunda divarın uçması nəticəsində 65 yaşlı kişi vəfat edib. Eyni zamanda, Barselonanın Montornes qəsəbəsində daha bir nəfərin ölümü təsdiqlənib, Pineda de Marda isə çayın daşması səbəbindən bir nəfər itkin düşüb.

Yağışların təsiri ilə fövqəladə yardım qrupları 5 mindən çox çağırışa cavab verib. Barselona və Kataloniyanın digər bölgələrində qatar və metro xətlərində ciddi fasilələr müşahidə olunub, bəzi yol hissələri nəqliyyata bağlanıb.

İspaniya Baş naziri Pedro Sançes şiddətli yağışların xüsusilə Barselonada ağır vəziyyət yaratdığını bildirib. O, sosial mediada paylaşdığı açıqlamada ölənlərin ailələrinə başsağlığı verib, insanlara əsassız səfərlərdən çəkinməyi və rəsmi xəbərdarlıqlara əməl etməyi tövsiyə edib.

Kataloniya Su Agentliyi (ACA) Ridaura çayının Santa Kristina d'Aro bölgəsində axının saniyədə 300 kubmetr həcmə çatdığını və 100 illik təkrarlaşma dövrünə bərabər olduğunu bildirir.

Qeyd edilən qəzalar yalnız Kataloniyada baş verməyib, Albasete şəhərində də 3 oktyabrda bir nəfər güclü yağışlar səbəbindən həlak olub.