İran ABŞ-ın təklifinə əlavə şərtlər göndərəcək

Anadolu Ajansı yazır ki, İranın Xarici İşlər Nazirliyinin sözçüsü İsmail Bəkayi Təhranda keçirdiyi mətbuat konfransında ABŞ-ın İran üçün təqdim etdiyi son təklifin əvvəlkilərlə demək olar ki, oxşar olduğunu bildirib.

Bəkayi ABŞ-ın təklifinə əlavə şərtlərin qarşı tərəfə çatdırılacağını deyib. Onun sözlərinə görə, Təhranın diqqət mərkəzində Hörmüz Boğazı məsələsi dayanır və bununla bağlı mesajlar Qətərdə vasitəçilərə göndərilib.

İran Hörmüz Boğazının təhlükəsizliyinin təmin olunmasını ABŞ-ın İranın dəniz nəqliyyatına müdaxiləsini dayandırması və sanksiyalardan imtina etməsi kimi konkret addımlardan asılı sayır. Bəkayi diplomatiyadan heç vaxt üz çevirmədiklərini vurğulayıb.

Sözçü əlavə edib ki, gələcəkdə İranın hədəfi olan ərazilərdən qonşu ölkələrin istifadəsi halında cavab tədbirləri fərqli metodlarla veriləcək. İran Körfəz ölkələri ilə dialoqu davam etdirməyə hazırdır, amma onların İran əleyhinə ritorikasından və ərazi iddialarından əl çəkməsini tələb edir.

İran və Livan arasında baş verən səfir münaqişəsi ilə bağlı Bəkayi bildirib ki, İrandan Livana səfir təyin olunub və diplomatik anlaşılmazlıqlar dialoq yolu ilə həll olunur.

Bəkayi Çin və Rusiya ilə yaxşı əlaqələrin olduğunu, bu əlaqələrin müxtəlif beynəlxalq platformalarda da davam etdiyini qeyd edib və lazım gəldikdə hər iki ölkə ilə uyumlu fəaliyyət göstərəcəklərini söyləyib.

İran həmçinin Yəməndə hadisələrə toxunub, Pakistandan Səudiyyəyə 40 min əsgər göndərilməsi ilə bağlı iddiaların həqiqət olmadığını bildirib.

ABŞ-ın İranın beynəlxalq hava yollarına qoyduğu məhdudiyyətlərə münasibət bildirən Bəkayi deyib ki, xarici marşrutlarla uçuşların qadağan edilməsi beynəlxalq hüquqa ziddir. İraqla bu məsələ həll olunub və digər ölkələrlə də müzakirələr aparılır.