İsrail qüvvələri işğal altındakı Qərb Sahilində avtomobilə atəş açaraq yeddi aylıq uşağı öldürüb, valideynlərini yaralayıb.

Fələstin Səhiyyə Nazirliyi bildirib ki, Sam Fahd Abu Haikal Cümə günü Həbronda "işğalçı qüvvələrin onlara atəş açmasından" sonra dünyasını dəyişib, valideynləri isə yaralanıb.

Dr. Tareq Barbaravi AFP agentliyinə deyib ki, körpə xəstəxanaya aparılıb, amma xəsarətlərindən vəfat edib.

Körpənin nənəsi Ferial Abu Haikal "Wafa" agentliyinə bildirib ki, İsrail əsgərlərinin atəş açanda onların avtomobilinin tam dayandığını görüb və buna təəccübləniblər.

O əlavə edib: "Atəş açmağa heç bir təhlükə və əsas yox idi."

İsrail ordusu X sosial şəbəkəsində yazıb ki, "operativ tədbir zamanı" əsgərlər "özlərinə tərəf sürətlə yaxınlaşan avtomobili fərq ediblər".

Əsgərlərin avtomobilə tək atəşlə cavab verdiyini bildirən ordu qeyd edib ki, nəticədə üç fələstinli yaralanaraq tibbi müalicə üçün təxliyə olunub.

İlkin araşdırma göstərib ki, yaralananlar mülki şəxslərdir və hadisə araşdırılır.

2023-cü ilin oktyabrında İsrail Qəzzaya müharibə başladandan sonra işğal altındakı Qərb Sahilində zorakılıq artıb.

AFP-nin Fələstin Səhiyyə Nazirliyinin məlumatlarına əsaslanan hesabatında qeyd edilir ki, İsrail qüvvələri və sakinləri Qərb Sahilində ən azı 1.080 fələstinlini öldürüb.