Şərqi Hindistanda, Bihar ştatında Ashok Dham məbədində baş verən izdihamda ən azı altı nəfər ölüb, bir neçə nəfər yaralanıb. Hadisə minlərlə ibadətçinin Lord Şivaya su təqdim etmək üçün axışdığı vaxt, Hinduların müqəddəs Shravan ayının xeyirli saydığı bazar günündə baş verib.

Yüksək rütbəli polis zabiti Şivam Kumar ANI xəbər agentliyinə deyib ki, hadisə yerində elektrik dirəyi aşaraq insanlara elektrik cərəyanı dəyib və bundan sonra izdiham yaranıb.

Kumar əlavə edib: "Dəqiq səbəbi yalnız hər şeyi yoxladıqdan sonra deyə bilərik".

Lakhisarai Rayon Hakimi Şailendra Kumar isə ANI-yə bildirib ki, izdiham vaxtı baryer qırılıb və insanlar bir-birinin üzərinə yıxılıb.

O qeyd edib: "Kütlə misli görünməmiş şəkildə artmışdı. Təxminən saat 6:30-6:45-də bura iki qatar gəlib və onlar da izdihama əlavə olunub. Biz adamların çoxluğunu gözlədiyimiz üçün lazımi hazırlıqlar görmüşdük".

Yaralılar müalicə alır

Hadisənin səbəbini araşdırmaq davam edir.

Bihar Baş naziri Samrat Çaudhari bildirib ki, hökumət yaralıların dərhal müalicə olunması üçün göstəriş verib.

O, hind dilində X platformasında yazıb: "Hadisədə ibadətçilərin ölümü xəbəri məni dərin kədərləndirdi. Başsağlığı diləyirəm".

Mart ayında Biharın Nalanda rayonundakı başqa bir məbədində baş verən izdihamda əsasən qadın olmaqla doqquz nəfər ölüb.