260 nəfərin həyatını itirdiyi Air India təyyarəsinin qəzasının səbəbləri üzrə istintaq davam edir. Son hesabat iş yekunlaşdıqdan sonra açıqlanacaq, Hindistanın Təyyarə Qəza Təhlili Bürosu (AAIB) bəyan edib.

Bəyanatda təyyarənin sistemləri, uçuş qeydiyyat cihazlarının məlumatları, mühərriklə bağlı komponentlər, texniki xidmət və əməliyyat qeydlərinin yoxlanılması və təhlili üzrə əhəmiyyətli irəliləyiş əldə olunduğu vurğulanıb.

Lakin istintaqın tamamlaşma tarixi bildirilmir.

2025-ci il iyunun 12-də Ahmedabad aeroportundan Londona uçan Boeing 787 Dreamliner təyyarəsinin qısa müddət sonra qəzaya uğramasının dəqiq səbəbi geniş müzakirələrə səbəb olub.

Ötən il iyulun 12-də dərc edilən ilkin hesabatda qeyd olunub ki, uçuşdan dərhal sonra yanacaq idarəetmə açarları birdən "kəsildi" mövqeyinə keçib. Bu, mühərriklərin yanacaqla təminatının dayanmasına və tam güc itkisinin yaranmasına səbəb olub.

Kokpitdən olan audio yazılarda bir pilot digərindən niyə belə etdiyini soruşur, digəri isə etmədiyini cavablandırır. Tədqiqatçılar hansı pilotun bu sözləri söylədiyini müəyyən etməyib.

İlkin hesabatdan bir neçə gün sonra "The Wall Street Journal" və Reuters xəbər agentlikləri istintaqda ortaya çıxan yeni detallara görə baş pilot Sabharvalın diqqət mərkəzində olduğunu yazmışdı.

Reuters-in anonim mənbələrə istinadla verdiyi məlumata görə, "qəzaya uğrayan Air India reysinin iki pilotu arasında kokpit dialoqunun yazısı" kapitanın təyyarənin mühərriklərinə yanacaq axınını kəsdiyini göstərir.

Bu xəbərlər Hindistandakı pilotlar birliyinin kəskin etirazına səbəb olub. Onlar məlumatları tənqid edərək baş pilotun qəza ilə əlaqəsi olması iddiasını və AAIB-ni rədd ediblər.