Pakistanın Pəncab əyalətində doqquz yaşlı avstraliyalı qız polis tərəfindən güllələnərək ölüb, ailəsinin iki üzvü isə yaralanıb.

Ailə Çakval bölgəsində qohumlarını ziyarət edirdi. Yerli vaxtla çərşənbə axşamı gecəsi kirayə maşında olarkən soyğunçular hücum edib, Pakistanın ingiliscə xəbər portalı Dawn xəbər verib.

İki motosikletlə qaçan və birinin əlində tapança olan soyğunçu polislər tərəfindən görüldükdə qaçıb, kirayə maşın da hadisə yerindən uzaqlaşıb.

Polisin rəsmi nümayəndəsi yerli mediaya deyib: “Polislər maşının dərhal uzaqlaşdığını gördükdə, onu soyğunçulara aid hesab edib avtomobila məhdudiyyətsiz atəş açıb.”

Perth şəhərinin Kivdel rayonundan olan ailə xəstəxanaya çatdırılıb, qız orada vəfat edib.

Onun atası və böyük qardaşı ağır yaralanıb, anası isə sağlamdır.

Xarici İşlər və Ticarət Nazirliyi öldürülən avstraliyalının və yaralanan iki avstraliyalının ailələrinə konsulluq dəstəyi verildiyini təsdiqləyib.

Nazirliyin sözçüsü bildirib: “Bu çətin vaxtda ailəyə dərin hüznlə başsağlığı veririk.”

Qərbi Avstraliya Pakistan Assosiasiyasının baş katibi Asim Çaudhri hadisənin yerli icmaya təsir etdiyini deyib. O, Nine News-a bildirib: “Bu xəbər çox kədərlidir, xüsusilə doqquz yaşlı qızın ölümü.”

“Onlar sadəcə Məkkə ziyarətindən qayıtmışdılar.”