Kenskof şəhərinin meri Massillon Con bazar gecəsi baş verən hücumdan sonra təxminən 40 cəsəd saydıqlarını deyib. O bildirib ki, axtarışlar davam edir və hələ də itkin düşən şəxslər var.

Mer toqquşmaların bir neçə aydır ərazidə hökm sürdüyünü və bu hadisəni dəhşətli gecə kimi xarakterizə edib.

O vurğulayıb ki, cinayətkarlar zorakılıqdan qaçan insanların məskunlaşdığı məkanı da hədəfə alıblar.

Massillon Con bildirib: “Banditlər kilsədə yerləşən məcburi köçkün düşərgəsinə hücum etdilər. Bir neçə adam öldürüldü, ölənlər və yaralananlar çoxdur. Bəzi şəxslər qaçaqmalçılar tərəfindən aparılıb.”

Baş nazir Aliks Didye Fils-Eymenin ofisi hücumdan sonra kədərli ailələrə və bütün qurbanlara dərin hüznlə başsağlığı verib.

Hökumət bölgədə təhlükəsizliyi təmin etmək üçün əlavə güclər göndərəcəyini açıqlayıb.

Kenskof Haitinin paytaxtının cənub-şərqində, dağlıq ərazidə yerləşən inzibati rayonudur. Burada bir neçə aydır silahlı qruplar arasında toqquşmalar və əraziyə nəzarəti artırmaq üçün mübarizə gedir.

Haiti Amerika qitəsinin ən kasıb ölkəsidir və uzun illər siyasi qeyri-sabitlik, təbii fəlakətlər, korrupsiya və silahlı dəstələrin artan zorakılığı ilə üzləşir. Bu dəstələr qətllər, zorakılıq, talan və girov götürmə kimi cinayətlər törədərək paytaxtın böyük hissəsini nəzarətdə saxlayırlar.

BMT-nin məlumatına görə, ölkədə təxminən 1,5 milyon məcburi köçkün var və 11 milyon əhalinin 5 milyondan çoxu ciddi ərzaq çatışmazlığı yaşayır.

2024-cü ilin əvvəlində dəstələr tərəfindən törədilən zorakılıq dalğası vəziyyəti ağırlaşdıraraq seçilməmiş baş nazirin istefasına səbəb olub.

Haiti 2016-cı ildən bəri seçki keçirməyib. Son prezident Covenel Moise 2021-ci ilin iyulunda qətlə yetirilib və onun yerinə kimsə seçilməyib.

Ölkədə ümumi seçkinin bu ilin dekabrında keçirilməsi planlaşdırılır.