Filistində Hamas, İslami Cihad və Dahlan yeni ittifaq qurdu

Anadolu Ajansı xəbər verir ki, Filistindəki Hamas, İslami Cihad və Muhammed Dahlan qrupları seçkilərdə birlikdə iştirak etmək üçün sürpriz ittifaq yaradıb. İslami Cihadın baş katib müavini Muhammed əl-Hindi açıqlayıb ki, bu ittifaq əsasən partiya üzvlərindən yox, müstəqil şəxslərdən təşkil olunacaq "ortaq milli siyahı"dan ibarət olacaq.

Bir vaxtlar Qəzzədə Hamas ilə qarşıdurmada olmuş və 2010-cu ildə Mahmud Abbas ilə münaqişə səbəbindən mühacirətə gedən Muhammed Dahlanın prosesə qatılması diqqət çəkir. Abu Dabidə yaşayan və BƏƏ-də müşavirlik edən Dahlanın ABŞ və İsrail rəsmiləri ilə əlaqələri var.

Bu ittifaq Abbas hökumətinə qarşı ortaq narazılıqdan irəli gəlir. Filistindəki son ümumi seçkilər 2006-cı ilin yanvarında keçirilmişdi. Abbas iyulun 9-da verdiyi sərəncamla işğal altındakı Şərqi Qüds, Qərb Şəriə və Qəzza zolağında ümumi seçkilərin 28 noyabrda keçirilməsini qərara alıb.

Daha əvvəl 2006-cı ildə Hamasın seçkiləri qazanmasından sonra yaranan gərginlik səbəbindən Abbas seçkiləri 2021-ci il də daxil olmaqla bir neçə dəfə təxirə salmışdı.

Muhammed Dahlan 2011-ci ildə Fəth Hərəkatının Mərkəzi Komitəsindən çıxarılıb. Ona qarşı Yəsir Ərafatın öldürülməsi və vəzifəsi dövründə mənimsəmələr ittihamları olub. 2016-cı ildə Filistin Məhkəməsi Dahlanı 16 milyon dolları mənimsəməkdə günahlandıraraq üç il həbs cəzasına məhkum edib.