Britaniyalı insan hüquqları vəkili deyib ki, Dubay hökmdarının nəvəsinin keçmiş həyat yoldaşı Zeynəb Cavadlı itkin düşüb.

Çərşənbə axşamı Cavadlı ilə əlaqə kəsilib, BBC-yə onun Dubaydakı evinin kilidli və boş olduğu bildirilib.

Cavadlı təhlükəsizliyi ilə bağlı narahatlığını dəfələrlə ifadə edib. O, uzun illər keçmiş əri Şeyx Said bin Maktum bin Rəşid əl Maktumla sərt uşaq himayəsi mübarizəsi aparır.

BBC BƏƏ rəsmilərindən şərh almağa çalışıb, lakin hələ cavab verilməyib.

Cavadlının dostları çərşənbə axşamı telefon zənglərinə və mesajlara cavab almayan zaman narahatlıq hiss ediblər.

Britaniyalı vəkil, aktivist Devid Heyq sonuncu dəfə çərşənbə axşamı gecə Cavadlı ilə danışdığını deyib. Onun sözlərinə görə, o vaxtdan bəri Cavadlı "itkin düşüb".

Heyq bildirib ki, Cavadlı və üç kiçik qızı görünməyib və onlardan heç bir xəbər yoxdur.

Vəkil BBC-yə deyib ki, məsul şəxslərdən ona Cavadlının taleyi barədə heç bir cavab verilməyib.

Cavadlının anası Dubaya səfər üçün gəlmişdi. O, evə gedib və oranın boş, kilidlərinin dəyişdirilmiş olduğunu görüb.

O, Dubay polisi və Cavadlının vətəndaşı olduğu Azərbaycan konsulluğu ilə əlaqə saxlayıb.

Aylarla Cavadlı demək olar ki, evdən çıxmayıb. O, təhlükəsizlik işçilərinin uşaqları ondan almaq və bəlkə də onu həbs etmək üçün gözlədiyinə inanırdı.

Keçən il Cavadlının keçmiş əri uşaqların qaçırılması ilə bağlı polisdə şikayət ərizəsi verib. Bu, onların uzun sürən uşaq himayəsi mübahisəsinin son mərhələsi idi.

Valideynlər arasında uşaqlar bir neçə dəfə dəyişdirilib və hər biri digərini oğurluqda ittiham edib.

Cavadlı – keçmiş beynəlxalq gimnast – BƏƏ-də onlayn cinayətlər üzrə tutulma riski ilə üzləşib. Keçən il bir qarşıdurmanı canlı yayımlayıb.

O, Heyqə video mesajında hərəkətlərini belə izah edib: "Uşaqlarımla olmaq üçün son şansın olduğunu bilirdim, çünki onlar məni yenidən görməyimə imkan verməyəcəklər. Mən həqiqətən bunu son şans hesab edirdim, ona görə canlı yayım açıb yardım istədim."

Cavadlının keçmiş əri, Şeyx Said bin Maktum bin Rəşid əl Maktumun hüquqşünasları uşaq himayəsi işində məhkəmədə deyiblər ki, Cavadlı qızları məktəbə göndərməyib, oteldə uşaqlar üçün uyğun olmayan yerdə yaşayır və ən kiçik qızın sağlamlığını riskə atıb. Onlar onu yararsız ana kimi göstəriblər.

Cavadlı ittihamları rədd edir və ərəb hüquq komandası bunun əksini məhkəmədə sübut edib.

Heyq deyib ki, indiki vəziyyət 5 il əvvəl Dubay hökmdarı Şeyx Məhəmməd bin Rəşid əl Maktumun qızlarından biri, şahzadə Latifanın əlaqələrinin kəsildiyi ilə "dərin və narahatedici oxşarlıq" göstərir.

Şahzadə Latifa 2018-ci ildə ailəsinin məcburi nəzarətindən qaçmağa çalışıb.

O, qaçarkən Hind okeanında gəmi saxlanılıb və zorla Dubaya qaytarılıb. Daha sonra gizli videolarda girovda olduğunu deyib.

Sonradan məhdud şəkildə ictimaiyyət qarşısına çıxıb, sağlam olduğunu və istədiyi kimi yaşadığını bildirib.

Heyq şahzadə Latifa üçün həmin vaxt kampaniya aparıb. O, indi beynəlxalq ictimaiyyəti Cavadlının harada olması və vəziyyəti barədə məlumat tələb etməyə çağırır.