Çin BMT-nin süni intellekt idarəsində əsas rolunu vurğulayıb

Anadolu Ajansı yazır ki, Çin Xarici İşlər Nazirliyinin sözçüsü Guo Ciakun Pekində keçirilən mətbuat konfransında Vaşinqtonla qlobal süni intellekt idarəçiliyində ikitərəfli dialoq mexanizminin təsirli model olub-olmaması barədə suala cavab verib.

Guo Çin süni intellekt sahəsində hər zaman konstruktiv və məsuliyyətli şəkildə iştirak etdiyini və öz töhfəsini verdiyini qeyd edib. O, BMT-nin bu sahədə əsas rol oynaması və daha bərabərhüquqlu, ədalətli qlobal süni intellekt idarəetmə sisteminin qurulmasının zəruri olduğunu vurğulayıb.

O bildirib ki, Çin ABŞ-la bu sahədə hökumətlərarası əlaqələri davam etdirməyə hazırdır. Bu addımın bütün tərəflər üçün faydalı olacağı, həmçinin iki ölkə arasındakı qarşılıqlı hörmət, ədalət və konstruktiv strateji sabitliyə uyğun olduğu qeyd olunur.

Çin Dövlət Başçısı Si Cinpinin sentyabrın 23-25-də ABŞ-a etdiyi səfər zamanı iki ölkənin süni intellekt dialoqunun başlanması və əlaqədar qəzalar üçün kommunikasiya kanalı yaradılması barədə razılığa gəldiyi açıqlanıb.

Əvvəllər ABŞ-ın süni intellekt təhlükəsizliyinə dair dar çərçivədə risklərin idarə olunmasına, Çin isə daha geniş qlobal idarəetmənin qurulmasına fərqli yanaşması dialoqun davam etməsinə mane olmuşdu.

Pekin çoxtərəfli əməkdaşlıq, etik standartların müəyyənləşdirilməsi və insan nəzarətinin təmin olunması kimi elementlərə əsaslanan geniş süni intellekt idarəetmə modelini dəstəkləyir. Bu məqsədlə Çin iyul ayında Dünya Süni İntellekt Əməkdaşlıq Təşkilatının (WAICO) yaradılmasını elan edib.