Böyük Britaniya Ukraynaya əlavə "Storm Shadow" raketləri göndərir

Məlumat mənbəyi Bloomberg-dir. O, məlumatlı şəxslərə istinadla yazıb.

Məlumatlı şəxslərin sözlərinə görə, Böyük Britaniya baş naziri Endi Bernem və Ukrayna prezidenti Volodimir Zelenski 14 oktyabr, çərşənbə günü, Zelenskinin Londona səfəri zamanı Britaniyada istehsal olunmuş qanadlı raket ehtiyatlarının artırılması məsələsini müzakirə ediblər.

Mənbələr bildirib ki, Böyük Britaniya Ukraynanın uzaqmənzilli silahları Rusiyanın mülki əhali və infrastruktur obyektlərinə hücumlarında istifadə olunması üçün yox, müdafiə məqsədi ilə işlətməsini qəbul edir.

Mənbələrin məlumatına görə, son həftələrdə Rusiya Ukraynaya hücumlarını gücləndirmək üçün pilotsuz reaktiv aparatların istehsalını artırıb. Bu baxımdan, Kiyevin həmin təhdidlərə qarşı təsirli müdafiə qurması vacib sayılır.

Mənbələr vurğulayıb ki, Böyük Britaniya hesab etmir ki, Ukrayna Rusiyaya zərbələri dayandırmalıdır, çünki Moskva bunu etmir.

Böyük Britaniya hökuməti mövzu ilə bağlı açıqlama verməyib. Hökumət müharibə zamanı Ukraynaya neçə "Storm Shadow" raketinin verildiyini açıqlamayıb və belə göndərişlər barədə müntəzəm məlumat vermir.

Son məlumatlara görə, Böyük Britaniya və Ukraina hava hücumundan müdafiə sistemlərinin sürətli tədarükü ilə bağlı razılığa gəliblər.

Bernem və Zelenskinin görüşünün əvvəlində Böyük Britaniya baş naziri Ukrayna liderinə Londondan dəstəyin dəyişməyəcəyini bildirib. O, həmçinin Zelenskinin "boş əllə" Londondan ayrılmayacağını deyib.

Qeyd edək ki, Bernem 24 avqustda Kiyevdə açıqlayıb ki, London "Storm Shadow" raketlərinin istehsal texnologiyasını Ukrayna ilə bölüşməyə qərar verib.