Cənubi Almaniyanın Bavariya əyalətində yerləşən otel İsrailli qonağın rezervasiyasını rədd edərkən nasist dövrünü xatırladan antisemitik ifadə yayıb. Məsələ İsrailin Almaniyanın cənubundakı konsulu Talya Ladorun X sosial şəbəkəsində paylaşdığı rədd cavabındakı mesaja görə gündəmə gəlib.

Lador alman dilində "1930-cu illərə qayıtmışıq?" deyə sual verib. Onun paylaşımındakı ekran görüntüsündə Bavariyadakı "Hotel zum Hirschen" otelinin ingilis dilində "otelimizdə yəhudilərə icazə verilmir" mesajı diqqət çəkir.

Otelin junior direktoru Andreas Vogl dpa agentliyinə açıqlamasında bu mesajın müəssisənin baxışını əks etdirmədiyini bildirib.

Otel üzrxahlıq edib və təklif irəli sürüb

Bavariya Meşəsində, Çexiya sərhədinə yaxın yerləşən otel qonaqdan üzr istəyib və ona, eləcə də ailəsinə bir həftə pulsuz qalmaq təklif edib. Məqsəd onların şəxsən tanınması və diskriminasiya edilmədiklərinin sübut olunmasıdır.

Otel e-poçtda yazıb ki, chatda bu cür cavab vermək səhv olub. Məktub Bavariya əyalət başçısının ofisinə göndərilib.

Bildirilib ki, otel uzun müddətdir saxta rezervasiyalar və müştəri məlumatlarının oğurlanması ilə mübarizə aparır. İsraildən gələn rezervasiya sorğusu da səhvən saxta kimi qəbul olunub.

Üzrxahlıq məktubunda qeyd olunub: "Bizə çox vacibdir ki, başa düşəsiniz ki, bu ifadə yəhudi dininə inananlara deyil, saxta rezervasiyalardan yaranan əsəbliliyə yönəlib. Yenə də bu qəbulolunmazdır və peşəkar iş mühitində olmamalıdır."

Antisemitizmlə bağlı araşdırma istənilib

Almaniyada Yəhudi Mərkəzi Şurası hadisənin araşdırılmasını tələb edib.

Şuranın prezidenti Josef Şuster dpa-ya deyib: "Bu qəbuledilməz ifadəyə görə üzrxahlığı qəbul edirəm, lakin belə fikirlərin yalnız düşünülməsi yox, yazılıb yayılması mənəvi baxımdan şokedicidir."

İsrailli turist həmçinin Bavariya Ədalət Nazirliyinin antisemitizmlə mübarizə idarəsinə şikayət edib. "Die Welt" qəzetinə görə, mesajın rəsmi prosedura səbəb olub-olmayacağı hələ qərara bağlanmayıb.

Qəzetin yaydığı xəbərə görə, otelin sahibi cavabı "təəssüf doğuran səhv" adlandırıb və insan səhvi olduğunu vurğulayıb. Sperl-Vogl ailəsi hadisə ictimaiyyətə çatdıqdan sonra təhdidlər aldığını deyir.

Andreas Vogl bildirib ki, "Booking.com" oteli platformadan çıxarıb.