Adobe Firefly süni intellekt köməkçisini yeniləyərək Premiere, Illustrator, InDesign və Frame.io proqramlarına əlavə edib.

Şirkət Firefly-a brend dəstləri, məhsul videoları və ssenarilər yaratmaq üçün yeni xüsusiyyətlər qatıb. Bundan əlavə, proqram yaradılan elementləri layihələr arasında istifadə üçün saxlamağa imkan verir.

Premiere-də istifadəçilər süni intellekt köməkçidən faylları qovluqlara bölmək, bir neçə klipi eyni anda adlandırmaq, müsahibə suallarını müəyyənləşdirmək və işarələr əlavə etmək üçün yararlana bilərlər. Illustrator-da isə köməkçi sənəddə qatları yenidən təşkil etmək və itkin şriftləri yoxlamaq funksiyalarını yerinə yetirir.

Firefly artıq "Express", "Photoshop" və "Acrobat" proqramlarında aktivdir, həmçinin ChatGPT, Claude və Copilot tərəfindən dəstəklənir. Adobe yaxın zamanda Google Gemini və Slack dəstəyini əlavə etməyi planlaşdırır.

Firefly yeniləmələri

Adobe Firefly-nı xüsusilə süni intellekt xüsusiyyətləri üzrə tədricən "Canva"ya oxşatmaq üçün proqramı AI alətləri ilə zənginləşdirir. Bu alətlər şəkillər, videolar və ssenarilər yaratmağa imkan verir. Şirkət yeni "Elements" funksiyası əlavə edib, hansı ki, AI tərəfindən yaradılan personajlar, obyektlər və məkanları sonrakı istifadə üçün saxlayır.

Firefly həmçinin "Projects" funksiyasını alıb. Bu funksiya mövcud materialları bir yerdə saxlamağa və konteksti paylaşmağa imkan verir. Bu, video seriyası və brend kampaniyaları hazırlayan komandalar üçün əlverişli ola bilər. Hər iki funksiya hal-hazırda şəxsi beta rejimindədir.

Şirkət istifadəçilərin Firefly-da brendi və onun üslubunu təsvir edə biləcəyini, həmçinin mövcud materialları yükləməklə logotiplər, brend kimliyi və rəng palitraları daxil olan brend dəsti hazırlaya, fotolardan məhsul videoları yarada biləcəyini bildirib. İstifadəçilər videolar üçün ssenarilər də yarada bilərlər.

Adobe proqramlarında süni intellekti genişləndirmək üzərində ciddi işləyir və yaxın vaxtlarda proqramlar arasında işləyə bilən AI köməkçi təqdim etmək niyyətindədir. Məqsəd AI vasitəsilə proqram daxilində bir neçə addımla yerinə yetirilən əməliyyatları avtomatlaşdırmaqdır.