ABŞ və Çin tariflərin azaldılması barədə razılığa gəlib

News.ru yazır ki, ABŞ və Çin tarif maneələrinin ümumilikdə 30 milyard dollar (2,34 trilyon rubl) məbləğində azaldılması barədə razılığa gəliblər. Çin XİN-in məlumatına görə, bu razılıq Çin lideri Si Cinpin ilə ABŞ Prezidenti Donald Tramp arasında rəsmi görüşlər zamanı əldə olunub.

İki ölkənin rəhbərləri Çin-ABŞ ticarət və iqtisadi məsləhətləşmələr mexanizminin müsbət rolunu və ticarət iqtisadiyyat komandalarının danışıqlarının nəticələrini təsdiqləyiblər. Razılığa əsasən, Ticarət Şurasının yaradılması və inkişafı, tariflərin qarşılıqlı azaldılması və Kuala-Lumpurda əldə olunan razılaşmanın müddətinin uzadılması nəzərdə tutulur.

Fox News-a istinadən Ağ Ev bildirir ki, azalmalar ABŞ-dan kənd təsərrüfatı məhsulları, balıq və dəniz məhsulları, emal olunmamış taxta, kosmetika və tibbi avadanlıqların ixracına təsir edəcək. Çin isə kiçik məişət texnikası, oyuncaqlar, bayram bəzəkləri və uşaqlar üçün avtomobil oturacaqlarının ticarətini asanlaşdıracaq.

2025-ci ilin fevralında Donald Tramp Çin mallarına 10 faiz tarif tətbiq etmişdi. Pekin isə ABŞ-dan kömür, mayeləşdirilmiş təbii qaz (MTQ), neft və avtomobillərə qarşı tariflərlə cavab vermişdi. 2025-ci il apreldə ABŞ tarifləri 145 faiz, Çin tarifləri isə 125 faizə çatmışdı.

2025-ci ilin mayında tərəflər 90 günlük atəşkəs razılaşması bağlamış, 2026-cı ilin sentyabrında isə maliyyə naziri Skott Bessent atəşkəs razılaşmasının müddətini 2027-ci ilin yanvarın 10-na qədər uzatdığını açıqlamışdı.

Çin rəsmiləri ABŞ mediasında Si Cinpin-in səfərinin işıqlandırılmasından narazılıq ifadə edib. Bu narazılığı həmçinin Tramp ilə media arasındakı münaqişələr artırıb.