Afrikalı müdafiə texnologiyaları şirkəti Terra Industries bazar ertəsi əlavə 18 milyon dollar maliyyə dəstəyi aldığını açıqlayıb və beləliklə, ilkin investisiya raundunu 52 milyon dollara çatdırıb. Bu raundun investorları arasında Co Lonsdleyin 8VC, Silent Ventures və Nova Global şirkətləri var.

2024-cü ildə təsis olunan Terra Afrikanın müdafiə texnologiyaları sahəsində ən çox tanınan şirkətlərdən birinə çevrilib. Şirkət avtonom sistemlər, dronlar, mina aşkar edən döyüş maşınları kimi infrastruktur qurmağı planlaşdırır. İlin sonuna qədər ən azı bir federal müqavilə daxil olmaqla 100 milyon dollar həcmində müqavilələr bağlamağı və on milyonlarla dollar gəlir əldə etməyi hədəfləyir.

Bu ilin əvvəlində Terra ardıcıl olaraq 11,75 milyon və 22 milyon dollar maliyyə dəstəyi alıb. 8VC ABŞ-ın müdafiə texnologiyaları sahəsində önəmli şirkətlərindən olan Andurilin də investorudur və Andurilin 100 milyard dollar dəyərində yeni maliyyələşdirmə raundu keçirməsi üçün danışıqlar apardığı bildirilir. Eyni zamanda 8VC Shield AI şirkətinə yatırım edir.

Terra rəqiblərini hökumət müqavilələri qazanmış bütün müdafiə şirkətləri, xüsusən də Türkiyə, Çin və Qərb təchizatçıları olaraq qiymətləndirir.

TechCrunch-ın əvvəlki məlumatına görə, terrorçuluq Afrika üçün əsas təhlükə olaraq qalır, lakin qitədəki bir çox ölkə təhlükəsizlik məlumatları üçün Qərb, Rusiya və ya Çinə bağlıdır. Bu ölkələr çoxlu beynəlxalq podratçılarla işləyir, nəticədə müdafiə təchizat zəncirləri parçalanmış və asanlıqla zəifləyə bilir.

Terra ölkələri hərbi və kritik müdafiə infrastrukturu ilə təmin edən ekosistemdə ən böyük oyunçu olmağı hədəfləyir.

Startap yeni sərmayəni qlobal cənubda istehsalı genişləndirmək, Londonda ofis açmaq, işçi sayını artırmaq və məhsul tətbiqini sürətləndirmək üçün istifadə edəcək. Həmçinin San Fransiskoda ofis açmaq və Vaşinqtonda mövqe tutmaqla kapitala və ABŞ tərəfdaşlığına daha rahat çıxış əldə etməyi planlaşdırır.