Somali ordusu saatlarla davam edən şiddətli döyüşlərdən sonra Baidoa şəhərində, Somali Cənub-Qərb Dövlətinin ən böyük şəhərində müxalif döyüşçüləri ərazidən çıxarıb.

Müdafiə Nazirliyinin açıqlamasına görə, bazar ertəsi səhər saatlarında, dövlətin keçmiş prezidenti Abdiaziz Hassan Mohamed Laftagareenin tərəfdarları federal qüvvələrin mövqelərinə hücum edib.

Nazirlik hücum edənlərin partlayıcılarla yüklənmiş avtomobillərdən istifadə etdiyini bildirib. Federal qüvvələr 30 hücumçunu məhv etdikdən sonra onların geri çəkildiyini qeyd edib. Laftagareenin qüvvələrinin al-Qaidə ilə əlaqəli "əl-Şabab" silahlı qrupla birlikdə döyüşdüyü vurğulanıb.

Daha əvvəl, Laftagareenin tərəfdarları Facebook-da şəhər mərkəzini ələ keçirdiklərini iddia etmişdilər.

Yerli sakinlər "AFP" agentliyinə deyiblər ki, bu toqquşmalar Somali ordusunun mart ayında şəhər üzərində nəzarəti ələ alması ilə başlayan ən güclü döyüşlərdir. "Həkimlər Sərhədsiz" təşkilatı Baidoada fəaliyyət göstərən xəstəxanasına bir neçə yaralının gətirildiyini və döyüşlərin iki cəbhədə davam etdiyini açıqlayıb.

Baidoa Somalinin paytaxtı Moqadişudan təxminən 245 kilometr şimal-qərbdə yerləşir. Burada müharibə və iqlim hadisələri səbəbindən məcburi köçkün olmuş yüz minlərlə insan yaşayır.

Laftagareen Cənub-Qərb Dövlətinə yeddi ildən çox rəhbərlik edərkən, mart ayında Prezident Hassan Şeyx Mohamudun qəbul etdiyi mübahisəli konstitusiya dəyişiklikləri ilə əlaqədar Moqadişu ilə əlaqələrini kəsib.

Dəyişikliklər Mohamudun prezidentlik müddətini bir il artırmaqla yanaşı, 2012-ci il müvəqqəti konstitusiyasında əks olunan həssas səlahiyyət bölgüsünü xeyli dəyişib.

Bu addım bütün ölkədə, o cümlədən paytaxtda toqquşmaların baş verməsinə səbəb olub. Döyüşlər zamanı Somali ordusu Baidoanı ələ keçirib və Laftagareen istefa verib.

Onun tərəfdarları may ayında dəfələrlə şəhərə hücum edib, dövlətin yenidən nəzarətini ələ keçirməyə çalışıblar, lakin uğursuz olublar.

Çatışmalar və davam edən sabitsizlik ölkədə ağır humanitar böhran yaradıb. Milyonlarla insan kütləvi qida çatışmazlığı və aclıqla üzləşir.