OpenAI-nin baş direktoru Sem Altman "Alfred" adlanan startapı dəstəkləyir. Bu startap robototexnika və avtomobil şirkətlərində mühəndislərin tədqiqat və inkişaf müddətlərini azaldan proqram təminatı üzərində işləyir.

Altmanın sərmayə firması "Hydrazine Capital" vasitəsilə yatırımı həyata keçirilib. Başqa investorlara "Khosla Ventures", "SV Angel" və "Chapter One" daxildir. Əsas quruculardan Ankit Ukil bildirib ki, hazırkı investisiya raundunda şirkətin dəyəri 40 milyon dollar civarındadır.

Startap təxminən doqquz ay əvvəl yaradılıb və Kaliforniyanın Houthorn şəhərində yerləşir. Qurucu heyətdə "Tesla"da dizayner kimi çalışan Ankit Ukil ilə əvvəlcə "Meta Reality Labs"da mühəndis olmuş Dömötör Gulyas iştirak edir. Digər komanda üzvlərinin "Tesla", "Ford" və "Honda" təcrübəsi var.

"Alfred"in əsas platforması hələ hazırlanma mərhələsindədir. Proqram mühəndislərin rutin işlərini avtomatlaşdırmaqla daha yüksək əlavə dəyər yaradan tapşırıqlara vaxt ayırmasına imkan verəcək. Ukil qeyd edib ki, bu kimi yeniliklər yeni Çin elektrik avtomobillərində artıq standart xüsusiyyətlər kimi tətbiq edilir. O, avtomobil, müdafiə və robototexnika sahələrindəki potensial müştərilərlə danışıqların davam etdiyini söyləsə də, onların adlarını açıqlamayıb.

Ukil və Altman arasında əlaqə avtomobillərə qarşı ortaq həvəs sayəsində yaranıb. Ukil deyib: “Sem ilə bir müddət əvvəl tanış oldum və o, şirkət yaranmamışdan əvvəl mənə güvənirdi”.

Şirkət fiziki süni intellekt sahəsinə kapitalın böyük axdığı bir vaxtda bazara çıxır. Bu termin süni intellektin fiziki ətraf mühitlə qarşılıqlı əlaqədə olan maşınlara tətbiqini əhatə edir. "Crunchbase" məlumatlarına görə, bu sahəyə aprel ayında təxminən 5,3 milyard dollar sərmayə yatırılıb.

Altman robototexnika sahəsinə marağını gizlətmir. O, "X" sosial şəbəkəsində yazdığı paylaşımda bu sahədə iki mərhələli vizyonunu açıqlayıb: yaxın müddətdə infrastruktur üzərində işləyən ustalarla birgə tətbiq, daha sonra isə hər kəs üçün mövcud olacaq şəxsi robotlar.

"PitchBook" məlumatları göstərir ki, Altman 15 illik karyerası ərzində 170-dən artıq investisiya portfeli formalaşdırıb. OpenAI-də sahibliyi olmasa da, "Stripe", "Reddit" və "Helion Energy" kimi şirkətlərə yatırdığı vəsaitlə şəxsi sərvətini əhəmiyyətli dərəcədə artırıb.