Rusiya Ukraynanın müxtəlif bölgələrində azı 9 nəfəri öldürüb, 57 nəfəri yaralayıb, Kiyevə genişmiqyaslı raket və dron hücumu edib

Rusiya hücumları ötən sutka ərzində Ukraynanın müxtəlif şəhər və rayonlarında ən azı 9 nəfəri öldürüb, 56 nəfəri yaralayıb. Rusiya əsasən Kiyevi hədəf alan kütləvi raket və dron hücumu başlayıb, yerli hakimiyyət orqanları oktyabrın 22-də açıqlayıb.

Kiyevdə oktyabrın 22-si gecə Rusiya ballistik raketləri nəqliyyat və tibb infrastrukturlarını bir neçə dalğada vurub. Bu hücumda ən azı 1 nəfər ölüb, 24 nəfər yaralanıb, şəhər hakimiyyəti bildirib.

Rusiya qüvvələri gecə saatlarında "İskəndər-M", S-400, "Zircon" və "Oniks" raketləri, eləcə də 210 müxtəlif növ dronla birgə kütləvi hücum başlayıb. Onların arasında 110-u reaktiv mühərrikli dronlar olub. Hava Qüvvələri bildirir ki, Kiyev əsas hədəf olub. Ukrayna hava müdafiəsi 181 dronu, o cümlədən 87 reaktiv dronu vurub. Hücum 32 ərazidə qeydə alınıb, vurulan hədəflərin qalıqları digər 8 əraziyə düşüb.

Xarkov vilayətində Rusiya hücumlarında 1 nəfər ölüb, 15 nəfər yaralanıb. Yaralılardan 3-ü uşaqdır. Hücumlar Xarkov və 11 digər yaşayış məntəqəsində olub, vilayət qubernatoru Oleh Sinyegubov açıqlayıb.

Sumı vilayətində də ötən sutka ərzində Rusiya dron hücumlarında 1 nəfər ölüb, 4 nəfər yaralanıb, vilayətin hərbi administrasiyası bildirib. Rusiya qüvvələri 14 icmanın 26 yaşayış məntəqəsinə 60-a yaxın hücum edib.

Donetsk vilayətində isə ötən sutka ərzində Rusiya hücumları zamanı Drujkovka və Kramatorsk şəhərlərində 2 nəfər ölüb, 9 nəfər yaralanıb, yerli qubernator Vadim Filashkin deyib.

Zaporojye vilayətində Rusiya hücumlarında 3 nəfər ölüb, 3 nəfər yaralanıb. Hücumlar Zaporojye və ətraf rayonları əhatə edib, vilayət qubernatoru İvan Fedorov bildirib. Rusiya qüvvələri ötən sutka ərzində 48 yaşayış məntəqəsinə 862 hücum təşkil edib.

Çerniqov vilayətində isə Rusiya qüvvələri iki dəfə "Banderol" dronları ilə Çerniqovdakı bir müəssisəyə hücum edib. Bu hücumda 1 nəfər ölüb, 1 nəfər yaralanıb, vilayət qubernatoru Viaçeslav Çaus açıqlayıb. Rusiya dronu həmçinin Semenivka kəndində kənd təsərrüfatı müəssisəsinə zərbə endirib. Bunun nəticəsində anbar və digər tikililər yanıb.