MİLANO – İtalyan moda qrupu OTB Viktor & Rolf brendi ilə əlaqələrini gücləndirir və brenddəki payını artıraraq tam nəzarətə sahib olur.

Renzo Rosso tərəfindən yaradılan bu moda qrupu 2008-ci ildə Viktor & Rolf brendinin 51 faiz payını alıb və 2019-cu ildə bu payı 70 faizə yüksəldib.

1993-cü ildə brendi yaradan Viktor Horsting və Rolf Snoeren yaradıcı direktor vəzifəsində növbəti beş il çalışacaqlar.

Maliyyə göstəriciləri açıqlanmayıb.

Renzo Rosso cümə axşamı bildirib: “Viktor və Rolf müasir modanın ən görkəmli və təsirli dizaynerlərindən ikisidir. İllər ərzində qarşılıqlı hörmət, yaradıcı azadlıq və müasir haute couture-nin ən innovativ dillərində eksperiment aparmaq arzusuna əsaslanan əlamətdar yol qət etmişik. Bu gün atdığımız əlavə addımla beynəlxalq lüks bazarında unikal, yaradıcı, bədii tədqiqatlara və mədəni əhəmiyyətə malik bir maison-la əlaqələrimizi daha da möhkəmləndiririk.”

OTB həmçinin "Diesel", "Jil Sander", "Maison Margiela" və "Marni" brendlərinin, o cümlədən Staff International və Brave Kid istehsal bölmələrinin sahibidir. Qrupun "Amiri"də də payı mövcuddur.

Viktor Horsting və Rolf Snoeren birgə açıqlama verərək deyiblər: “"Viktor & Rolf" üçün yaradıcı direktor kimi fəaliyyətimizi böyük məmnuniyyətlə davam etdirəcəyik. Moda dünyasını ideyalar və eksperimentlər laboratoriyası kimi araşdıracağıq.”

Dizaynerlər haute couture ilə yanaşı hazır geyim, gəlinlik və eynək kolleksiyasını da genişləndiriblər. Maison 20 ildən artıqdır ki, yüksək səviyyəli ətirlər - "Flowerbomb", "Spicebomb" və "Bonbon" - hazırlayan və qlobal şəkildə paylayan L’Oréal Luxe ilə uzunmüddətli əməkdaşlıq əlaqəsi saxlayır.

Onların bədii yaradıcılığı Avropa, Asiya və ABŞ-da MET Muzeyi (Nyu-York), Viktoriya və Albert Muzeyi və Barbikan İncəsənət Qalereyası (London), MAXXI (Roma), Kunsthalle Münhen, High Museum of Art (Atlanta) və Sea World Mədəniyyət və İncəsənət Mərkəzi (Şenzen) kimi aparıcı mədəniyyət müəssisələrində sərgilər və təqdimatlarla yüksək dəyərləndirilir.