Myanmar ordusu Rakhine-də hava hücumu etdi

Al Jazeera yazır ki, Myanmar ordusu tərəfindən həyata keçirilən hava hücumu ölkənin qərbində, Rakhine vilayətində, müxalifət qruplarının nəzarətində olan ərazidə 33 nəfərin ölümünə səbəb olub.

Hücum bazar yaxınlığında Kyauktaw şəhərində baş verib, 36 nəfər yaralanıb. Həlak olanlar arasında satıcılar, alıcılar və piyadalar var. Arakan ordusunun bildirdiyinə görə, bu, Rakhinedəki ən ağır hava zərbələrindən biridir və ölənlərin sayı artmaq ehtimalı var.

Rakhinedəki xilasetmə rəsmisi Vay Hun Aunq zərbənin bölgənin əsas topdan satış mərkəzində baş verdiyini təsdiqləyib. Sosial mediada yayılan görüntülərdə yanğınlar, zədələnmiş nəqliyyat vasitələri və yaxınlıqdakı körpünün qismən dağıdılması əks olunub.

Myanmar hərbi rəhbərliyi hələ hücumla bağlı şərh verməyib, amma bundan əvvəl yalnız legitim hərbi hədəflərə zərbələr endirdiklərini və müqavimət qruplarını "terrorizm"də ittiham etdiklərini açıqlamışdı.

Myanmar 2021-ci ildə hərbi çevriliş nəticəsində hakimiyyətə gələn ordu ilə müxalif etnik və demokratiya yönümlü qruplar arasında vətəndaş müharibəsi şəraitindədir. Arakan ordusu bölgədəki etnik azlığa avtonomiya tələb edir və 2023-cü ildən başlayaraq əhəmiyyətli əraziləri ələ keçirib.

Beynəlxalq təşkilatlar bildirir ki, Rakhinedə demək olar ki, yarım milyon nəfər məcburi köçkün vəziyyətindədir və insan haqları vəziyyəti pisləşib. Hücumlar ərzaq çatışmazlığını daha da dərinləşdirir.