İsveçrə seçiciləri neytrallıq qaydalarının sərtləşməsinə qarşı çıxdı

Al Jazeera yazır ki, İsveçrə seçicilərinin təxminən 71 faizi keçən bazar günü keçirilən referendumda ölkənin uzunmüddətli neytrallıq statusuna sərt konstitusiya məhdudiyyətləri qoyulmasına qarşı səs verib.

Bu nəticə hökumətin sanksiyalar tətbiq etmək və NATO ilə əməkdaşlıq imkanını qoruyub saxlayacaq, yəni neytrallıq anlayışını daha dar konstitusiya çərçivəsində məhdudlaşdırmayacaq.

Müraciət İsveçrənin neytrallığını “əbədi və silahlı” kimi təsbit etmək üçün hazırlanmışdı. Təklifə görə, İsveçrə yalnız hücuma məruz qaldıqda və ya hücum təhlükəsi olduqda hərbi ittifaqlara qoşulmalı və ya əməkdaşlıq etməli idi, müharibədə olan dövlətlərə qarşı sanksiyalar isə yalnız BMT Təhlükəsizlik Şurasının təsdiqi ilə tətbiq edilə bilərdi.

Bu təşəbbüsü milli suverenlik tərəfdarları və ölkənin ən böyük sağçı partiyası, İsveçrə Xalq Partiyası (SVP) dəstəkləyirdi. Onlar bildirmişdilər ki, Avropa İttifaqının Rusiyaya qarşı sanksiyalarına qoşulmaq və NATO ilə təhlükəsizlik əməkdaşlığının genişləndirilməsi ölkənin ənənəvi neytral rolunu zəiflədib.

Əksinə, hökumət, parlament və demək olar ki, bütün əsas siyasi qüvvələr təşəbbüsə qarşı çıxaraq bunun ölkənin beynəlxalq böhranlara daha çevik cavab vermək qabiliyyətini azaldacağını bildirib.

Referendum 2022-ci ildə Rusiya Ukraynaya genişmiqyaslı hücumunu başladıqdan sonra neytrallıq məsələsinin kəskinləşməsi fonunda keçirilib. İsveçrə Moskva əleyhinə Avropa İttifaqının sanksiyalarını qəbul edib ki, bu da Rusiyanın və neytrallığın möhkəmləndirilməsini istəyənlərin tənqidinə səbəb olub.