İspaniyada daşqınlar iki nəfərin ölümü və birinin itkin düşməsi ilə nəticələnib

Deutsche Welle yazır ki, İspaniyanın şimal-şərqində yerləşən Kataloniya bölgəsində bazar günü intensiv yağışlar daşqınlara səbəb olub.

Kataloniya bölgəsinin bəzi yerlərində, xüsusilə Barselona və Cironada su ehtiyatlarının daşmaq təhlükəsi yarandığı üçün əhali evdə qalmağa çağırılıb.

Bir şəxs Barselona şimalında, Tordera kampında divarın uçması nəticəsində, digəri isə Montornes del Valles qəsəbəsində su altında qalmış qarajda boğularaq dünyasını dəyişib.

Pineda de Mar şəhərində isə itkin düşmüş bir şəxsin tapılması üçün təcili xidmətlər axtarış aparır.

Kataloniya regional rəhbəri Salvador İlla sakinlərə maksimum ehtiyatlı olmalarını və təcili xidmətlərin göstərişlərinə əməl etmələrini tövsiyə edib.

Yerli meteoroloji agentliyin məlumatına görə, gecə boyunca bəzi ərazilərdə 100 millimetrdən çox yağış düşüb, nəticədə Besos çayının sahillərində daşqın riski yaranıb, ev sakinləri təhlükə zamanı yuxarı mərtəbələrə çıxmağa dəvət olunub.