İlqar Musayev ölkənin informasiya təhlükəsizliyinin inkişaf etdiyini bildirib

Report.az "Xüsusi Rabitə və İnformasiya Təhlükəsizliyi Dövlət Xidməti"nə (XRİTDX) istinadla yazır ki, Xidmət rəisi İlqar Musayev əməkdaşların peşə bayramı münasibətilə keçirilən tədbirdə ölkənin informasiya təhlükəsizliyi və xüsusi rabitə sahəsinin yeni inkişaf mərhələsinə keçdiyini bildirib.

İ.Musayev Ümummilli Lider Heydər Əliyevin dövlətçilik fəaliyyətini, onun uzaqgörən siyasəti nəticəsində Azərbaycanın mürəkkəb tarixi-siyasi sınaqlardan uğurla çıxdığını qeyd edib. O, həmçinin peşə bayramının tarixi və əhəmiyyətindən danışıb.

Xidmət rəisi vurğulayıb ki, bu sahə Prezident, Ali Baş Komandan İlham Əliyevin daim diqqətindədir. Dövlət başçısının rəhbərliyi ilə qəbul olunan strateji qərarlar, normativ-hüquqi baza və maddi-texniki imkanların təkmilləşdirilməsi sahənin inkişafına şərait yaradıb.

Son illərdə XRİTDX-nin dövlət informasiya resurslarının qorunmasında rolu artıb. Tədbirdə Azərbaycanın müstəqilliyi və təhlükəsizliyi uğrunda şəhidlərin xatirəsi ehtiramla yad olunub, hərbi qulluqçular medallar və fəxri fərmanlarla təltif olunublar.

26 sentyabr XRİTDX əməkdaşlarının peşə bayramı günü olaraq təsis olunub. Xidmət rəhbərliyi ilə şəxsi heyət Fəxri xiyabanı və Şəhidlər xiyabanını ziyarət edərək, Ulu Öndər Heydər Əliyev və akademik Zərifə Əliyevanın məzarları önünə gül dəstələri qoyub.