FairSquare insan haqları təşkilatı FIFA-dan qərar verməsini tələb edib ki, Canin İnfantino futbol üzrə nizamlayıcı orqanın prezidenti vəzifəsinə daha bir müddət üçün namizədlik irəli sürə bilməz. Səbəb kimi onun qurumun nizamnaməsinə əsasən maksimum üç müddət artıq xidmət etməsi göstərilir.

FIFA prezidentləri yalnız üç müddət vəzifədə qala bilərlər. Lakin 2022-ci ildə İnfantino bəyan edib ki, onun ilk rəhbərlik dövrü 2016-cı ildə Sepp Blatterin istefasından sonra keçirilən fövqəladə FIFA konqresində seçilməsindən başlayıb və bu dövr fasilə verilmiş mandatın tamamlanması sayılır. Buna görə də o, həmin müddətin limitə daxil edilməməli olduğunu əsas gətirib.

The Athletic-in məlumatına görə, FairSquare FIFA-nın İdarəetmə, Auditi və Uyğunluq Komitəsinə (GACC) göndərdiyi məktubda bu arqumentin FIFA nizamnaməsinə uyğun gəlmədiyini bildirib.

FairSquare-in direktoru Nikolas MakGihan Reuters-ə açıqlamasında deyib: “Bizim şikayətimiz qaydaların açıq pozulması üzrə aydın sübutlar göstərir və bu, çox təhlükəli presedent yaradacaq.

Qaydalar presidentlikdə maksimum üç müddət ola biləcəyini açıq şəkildə bildirir; FIFA prezident hakimiyyətini məhdudlaşdıran bu qaydaya əməl etmədən, sadəcə, onun ilk müddətini saymamaq cəhdi ilə bu qaydanı ötə bilməz.”

İnfantino qarşısında gələn ilin FIFA konqresi ərəfəsində tənqidlər artır. Orada o, 2027-31-ci illər üçün yenidən seçilmək istəyir. Səsvermə martın 18-də Mərakeşdə baş tutacaq.

Ötən həftə UEFA, Asiya Futbol Konfederasiyası və CONCACAF İnfantinonun davranışının təhlil olunmasını tələb edib. Bu, FIFA-nın Dünya Çempionatı da daxil olmaqla yarışları üçün 20 milyard dollar dəyərində filial yaratmaq təklifindən sonra baş verib. Məqsəd özəl investisiyalar cəlb etməkdir. Reuters-in mənbələri bildirib ki, üç konfederasiya məktubu İnfantinonun ləyaqətlə istefa verməsi üçün fürsət kimi qiymətləndirib.

Bəzi milli assosiasiyalar da narahatlıq ifadə edib. Şotlandiya Futbol Assosiasiyasının baş direktoru İan Maksvel bazar ertəsi BBC-yə deyib ki, federasiyası İnfantinonun yenidən seçilməsini dəstəkləməyəcək.

Lakin İnfantino Afrika və Cənubi Amerika konfederasiyalarının dəstəyini saxlayır.

Şəffaflıqla bağlı suallar

FairSquare həmçinin 2022-ci il qərarının şəffaflığına şübhə ilə yanaşıb. Təşkilat komitənin arqumentlərinin heç vaxt açıqlanmadığını bildirib.

MakGihan söyləyib: “Onların bu iddianı dəstəkləyən arqumentləri təqdim etməməsi və qərarın Qətər 2022 Dünya Kubokunun finalından iki gün əvvəl elan olunması göstərir ki, onlar dəqiq bilirdilər ki, İnfantinonun ilk müddətini nəzərə almamaq üçün əsas yoxdur.”

GACC-ya göndərilən məktub FIFA-nın müstəqil İdarəetmə və İcmal Komitəsinin sabiq rəhbəri Miquel Maduro-nun yardımı ilə hazırlanıb. O bildirib ki, qurum öz qaydalarını nəzərə almadan qərar verə bilməz.

Maduro açıqlamasında vurğulayıb: “Müddət məhdudiyyətləri prinsipi 2016-cı il islahatının əsas istiqaməti olub. Məqsəd hakimiyyəti məhdudlaşdırmaqdır və tətbiq olunan qayda aydındır: FIFA prezidenti üç müddətdən artıq işləyə bilməz.”

“Belə qaydaya istisna yaratmaq cəhdi həm müddət məhdudiyyətləri prinsipinə qarşıdır, həm də göstərir ki, FIFA-da bəziləri qaydaları maneə kimi qəbul edir, qayda yox.”