Əfqanıstan sərhəd kəndində 28 döyüşçünü məhv etdi

Al Jazeera yazır ki, Əfqanıstanın Müdafiə Nazirliyi ölkənin şərqindəki Nuristan vilayətində Pakistan sərhədindən keçən 28 döyüşçünü məhv etdiyini açıqlayıb.

Talibanın müdafiə nazirliyi bazar günü baş vermiş toqquşmaların təsdiqini verərək, döyüşçülərin əksəriyyətinin keçmiş Əfqanıstan hökumətinin təhlükəsizlik işçiləri olduğunu bildirib.

Müdafiə nazirliyi bu döyüşçülər arasında İŞİD üzvlərinin olduğunu və onların Pakistan silahlı dəstələri tərəfindən dəstəkləndiyini iddia edib.

Pakistanın İnformasiya və Yayım Nazirliyi bu ittihamları əsassız və yalan adlandıraraq, sərhəddəki qarşıdurmalarda təhlükəsizlik qüvvələrinin iştirakını rədd edib.

Pakistanda bildiriblər ki, Taliban terror təşkilatlarına qarşı ciddi tədbir görməli və Əfqanıstan torpağının digər ölkələrə qarşı terror üçün istifadə edilməsinə imkan verməməlidir.

Hadisə Pakistanla Əfqanıstan arasında gərginliyin artdığı vaxt baş verib. Pakistan bu ayın əvvəlində Əfqanıstanın 10 ərazisinə hava zərbələri endirib, burada dronların saxlandığı və hücuma hazırlandığı iddia olunub.