AI agent trafiki insan trafiyini ötəndə ticarət və maliyyə sahəsində fəaliyyət göstərən şirkətlər istifadəçilərin adından sürətlə hərəkət edən agentlər yaratmaq üçün yeni alətlər hazırlayırlar. Robinhood ticarət platforması istifadəçilər adından ticarət edə bilən agentləri təqdim etdikdən bir neçə gün sonra, Coinbase öz agentlərini işə salıb. Bu agentlər ticarət əməliyyatlarını icra edir və premium araşdırmalar üçün ödəniş edə bilirlər.

Şirkət cümə axşamı bildirib ki, istifadəçilər agenti əsas hesablarına qoşub ticarətə başlaya bilərlər. Əgər istifadəçilər agentə əsas hesab girişini vermək istəməzsə, onu ayrı sandbox rejimində işlədə bilərlər.

Coinbase qeyd edib ki, agent peşəkar treyderlər üçün nəzərdə tutulmuş vasitələrdən, o cümlədən extra funksiyaları olan Coinbase Advanced platforması və TradingView qrafiklərindən istifadə edərək ticarəti analiz edib həyata keçirə bilər. İstifadəçilər agentdən portfellərini yenidən balanslaşdırmağı, investisiya planını izləməyi və onların adından ticarət aparmağı, həmçinin bir dəfəlik kripto ticarəti ilə bağlı məsləhət verməsini tələb edə bilərlər.

Hazırda agent kripto spot bazarlarda və törəmə məhsullarda ticarət edə bilir. Gələcəkdə isə, səhmlər və proqnoz bazarlarının dəstəklənməsi planlaşdırılır. Coinbase yaxın vaxtlarda agentin maksimal ticarət ölçüsü, hansı xidmətlərlə qarşılıqlı əlaqədə ola bilməsi və maksimal xərcləri kimi xüsusi limit imkanlarını əlavə edəcəyini açıqlayıb.

Şirkət keçən il AWS, Anthropic, Circle və Near ilə birgə təqdim etdiyi açıq x402 ödəniş protokolundan istifadə edir. Bu standartla agent premium araşdırma məlumatlarına, API-lərə və ticarət analitikası üçün hesablama xidmətlərinə istifadəçinin giriş və ya abunə tələb etmədən ödəniş edə bilir. Bu mexanizm agentin x402 protokolu ilə xidmətlərə çıxış hüququnu təmin edir.

Son illər Coinbase AI alətlərinə fəal investisiya yatırır. Şirkət 2024-cü ildə AgentKit platformasını təqdim edib ki, bu da inkişaf etdiricilərə avtomatlaşdırılmış cüzdanları tətbiqlərinə əlavə etməyə imkan verir. Ötən ilin dekabrında isə ticarət göstərişləri və maliyyə məsləhəti verən AI əsaslı köməkçi tətbiqə əlavə olunub. Yeni agent buraxılışı MCP server vasitəsilə həm ChatGPT, həm də Claude platformalarında işləyə bilir.

AI Məhsul Rəhbəri Linkoln Murr TechCrunch-a yazılı açıqlamasında deyib: “Coinbase for Agents illərlə agent iqtisadiyyatı üzərində toplanan təcrübəyə əsaslanır. Əsas məqsəd əməliyyat aparan agentlər yaratmaqdır. Biz digər ticarət platformalarından fərqli olaraq mübadiləyə doğma ödəniş protokolunu əlavə edən yeganə platformayıq. Məqsədimiz gələcəkdə internetin böyük hissəsinin agentlər vasitəsilə istifadə olunacağı dünyaya tamamilə fərqli məhsulla addımlamaqdır.”

AI şirkətləri agent ödənişləri üçün yeni tərəfdaşlıqları sürətlə genişləndirirlər. Ötən ay Visa agent ödənişlərini inkişaf etdirmək üçün Replit-ə sərmayə qoyub. Ödəniş şəbəkəsi şirkəti bu həftə OpenAI ilə oxşar məhsulları araşdırmaq üçün razılığa gəlib. AI sahəsində inkişaf tempi qlobal maliyyə tənzimləyicilərinin diqqətini çəkib. Maliyyə Sabitliyi Şurası (FSB) bildirib ki, AI ilə əlaqəli risklərin azaldılması üçün güclü qoruyucu tədbirlər görülməlidir.