"Cerebras" səhm qiymətləri ABŞ bazarının açılışından əvvəl 14 faiz enib. Şirkətin illik mənfəət marjasının ilk rübdəki göstəricidən aşağı olacağı ilə bağlı açıqlaması investorların narahatlığına səbəb olub.

Əgər səhmlər açılışda da düşüşü davam etdirərsə, bu, "Cerebras"ın fond bazarına daxil olmasından bir ay çox vaxt keçməsinə baxmayaraq ən aşağı səviyyəsinə geriləməsi demək olacaq. Bununla şirkət bazar dəyərindən 6 milyard dollaradək itkiyə məruz qala bilər.

"Cerebras" 2026-cı il üçün tənzimlənmiş ümumi marjanın 38 faizdən 41 faizə qədər olacağını bildirib. Bu, 2026-cı ilin birinci rübündə açıqlanan 47 faizdən aşağıdır.

Şirkətin rəqibləri — "Nvidia"nın təqribən 70 faiz və "Advanced Micro Devices"in 50 faiz olan orta marjaları ilə müqayisədə bu proqnoz aşağı qalır. Lakin analitiklərin gözləntiləri olan 29,58 faizi aşdığı qeyd edilir.

Analitiklər hesab edir ki, "Cerebras"ın daha böyük ölçülü çiplər istehsal etməsi və mövcud müştəridən icarəyə götürülmüş avadanlıqlarla qısa müddətli tələbi qarşılamağa çalışmağı marjanın təzyiq altında qalmasına səbəb ola bilər.

"Cerebras" səhm qiymətləri süni intellekt sektorunda yaranan təlaş və yeni texnologiya infrastrukturuna yönəlik yüksək xərclər fonunda bazarda debütündən bəri 27 faizdən çox azalıb.

Buna baxmayaraq, "Morgan Stanley" səhmlərin hədəf qiymətini 250 dollardan 273 dollara qaldırıb. "TD Cowen" şirkətin "Amazon" və "OpenAI" ilə bağladığı müqavilələri uzunmüddətli inkişaf üçün vacib sayır.

Kaliforniyada yerləşən "Cerebras" "OpenAI" ilə 20 milyard dollar dəyərində çoxillik müqavilə bağlayıb. CEO Endryu Feldman bildirdi ki, "OpenAI"nin GPT 5.4 modeli "Cerebras" çipləri üzərində işləyir.

"ChatGPT" istehsalçısı bu müqavilə çərçivəsində şirkətin çiplərindən 750 meqavatlıq istifadə planlaşdırır.

Bundan əlavə, "Amazon Web Services" yaxınlarda "Cerebras" çiplərini data mərkəzlərində tətbiq etməyə başlayacaq. Gəlirlər isə növbəti ildə reallaşacaq.