Böyük Britaniya hökuməti dəniz külək sahəsində texnoloji yenilikləri sürətləndirmək üçün ümumilikdə 15 milyon funt sterlinq dəyərində bir sıra təşəbbüslər elan edib.

Bu paket "Innovate UK" vasitəsilə təqdim olunub və yeni dəniz külək texnologiyaları inkişaf etdirən şirkətləri dəstəkləməyi məqsəd qoyur. Təşəbbüslər aparıcı britaniyalı innovatorların beynəlxalq və daxili təchizat zəncirlərini genişləndirməsinə və ölkənin dəniz küləyi sahəsində qlobal liderliyini qorumasına kömək edəcək.

"Innovate UK" Təmiz Enerji direktoru Rob Saunders bildirib: “Bu, koordinasiyalı dəstək paketidir və yeni strateji istiqamətimizi həyata keçirdiyimizi göstərir. Biz Böyük Britaniyanın dərin və yüksək texnologiyalar sektorunu dəstəkləyir, innovatorlara qlobal rəqabətədavamlı şirkətlərə çevrilmək üçün maliyyə, infrastruktur və əlaqələr təqdim edirik.”

O əlavə edib: “Dəniz külək sənayesində innovasiyanı bütün sahələrdə tətbiq etməklə, məqsədimiz ambisiyalı innovatorlar üçün Böyük Britaniyada inkişaf və tərəqqi şəraitini yaratmaq, təmiz enerji təchizat zəncirlərini gücləndirmək və net-sıfır hədəflərinə doğru irəliləyişi təmin etməkdir.”

Təşəbbüsün əsas hissəsi kimi yüksək potensiala malik britaniya şirkətləri üçün ilkin 10 milyon funt sterlinq məbləğində yarışmanın dəstəklədiyi Dəniz Külək İnnovasiya Proqramı işə salınıb.

Proqram qabaqcıl turbina texnologiyalarının, növbəti nəsil təməllərin və substrukturaların, eləcə də gələcək elektrik sistemləri və kabellərinin inkişafını təşviq edir. O, həmçinin ağıllı ətraf mühit xidmətləri və quraşdırma, əməliyyatlar, texniki xidmət sahəsində innovasiyanı dəstəkləyir.

Bu yarışmanın ilk uğurlu layihələri ilin sonunda açıqlanacaq.

İnnovasiya proqramına paralel olaraq, sənaye, hökumət və elmi ictimaiyyəti birləşdirən və dəniz külək tədqiqatı ilə kommersiyalaşmanın inkişafını təkan verən Külək İnnovasiya Mərkəzi yaradılıb. Onun büdcəsi 5 milyon funt sterlinqdir.

Mərkəz sürətlə inkişaf edən dəniz külək şirkətlərinə hədəflənmiş texniki dəstək üçün 2 milyon funt sterlinqədək vəsait verəcək İnnovasiya İnkubatoru fondunu da işə salacaq. Fond bizneslərin innovasiyadan kommersiya mərhələsinə keçidini sürətləndirməyi nəzərdə tutur.

Külək İnnovasiya Mərkəzinin maliyyələşdirilməsi "Innovate UK" tərəfindən təmin edilir. Layihənin icrasını Dəniz Bərpa Olunan Enerji Katalizatoru və Yüksək Dəyərli İstehsalat Katalizatoru birgə idarə edir. Liderliyi isə Milli Kompozitlər Mərkəzi və Şotlandiyanın Milli İstehsalat İnstitutu həyata keçirir.

Yerli səviyyədə isə Isle of Wight adasında yerləşən Böyük Struktur İnnovasiya Mərkəzinin (LSIC) birinci mərhələsi "Innovate UK" tərəfindən 10 milyon, Enerji Təhlükəsizliyi və Net-Sıfır Departamenti tərəfindən isə 2 milyon funt sterlinq dəstəklənəcək.