Binyamin Netanyahunun BƏƏ-yə gizli səfəri açıqlandı

News.ru yazır ki, İsrailin Baş naziri Binyamin Netanyahu Abu-Dabiyə gizli səfər edib. O, BƏƏ prezidenti Şeyx Məhəmməd bin Zaid əl-Nəhayanla görüşüb. Bu səfər barədə rəsmi açıqlama verilməyib.

Kan telekanalı bildirir ki, Netanyahu səfərində İsrail iş adamının xüsusi təyyarəsindən istifadə edib. Bu təyyarə digər yüksək vəzifəli şəxslər tərəfindən də beynəlxalq uçuşlar üçün istifadə olunur. Baş nazir BƏƏ-də bir neçə saat qalıb.

Bu səfər İsraildə "Haaretz" qəzetində yayımlanan skandal xəbərlə üst-üstə düşüb. Məqalədə Şeyx bin Zaidın Netanyahuya 7 oktyabr 2023-cü ildən əvvəl HƏMAS tərəfindən mümkün hücum barədə xəbərdarlıq etdiyi, lakin onun bu məlumatı təhlükəsizlik xidmətlərinə çatdırmadığı iddia olunub. Netanyahu bu məlumatları təkzib edib, BƏƏ isə mövzuda rəsmi açıqlama verməyib.

Yayılan xəbərlər İsraildə geniş ictimai rezonans yaradıb. Müxalifət hökuməti vəzifəsini yetərincə yerinə yetirməməkdə günahlandırıb və 7 oktyabr faciəsi ilə bağlı dövlət komissiyası yaradılmasını tələb edir.

Netanyahu əvvəllər İsrailin cari hərbi əməliyyatlarda qalib gələcəyini vurğulayıb. O deyib ki, yəhudi dövlətinin başqa yolu yoxdur və israillilər ölkələrini müdafiə edib qələbə qazanacaqlar.